ء«ار ىنىسىنە ءۇي الىپ بەرگەن»: ايس مۇراتوۆاعا الدانعان قازاقستاندىقتار الاياقتىڭ تۋىستارىنىڭ دا جازالانۋىن تالاپ ەتىپ وتىر

فوتو: ۆيدەودان سكرين

ايس مۇراتوۆا ەسىمدى كەلىنشەككە الدانىپ, اقشاسىنان ايىرىلعان حالىق الاياقتىڭ اقشانى وزىنە عانا ەمەس, تۋىستارىنا دا اۋدارعانىن ايتادى. جابىرلەنۋشىلەر الاياقتىقپەن كەلگەن اقشا مەن قىمبات م ۇلىكتەردىڭ تاركىلەنىپ, اقشالارىن قايتارۋىن تالاپ ەتىپ وتىر. بۇل تۋرالى qandastar.kz كتك ارناسىنا سىلتەمە جاساپ حابارلايدى.

الاياققا الدانعان مىڭعا جۋىق جابىرلەنۋشى قىتايدان ارزانعا تاۋار الىپ, كاسىبىن دوڭگەلەتەمىز دەپ ويلاعان.

“باعاسى تيىن بولدى. مىسالى, بىزدە 11 مىڭدىق شاينەكتەر مىڭ جارىم تەڭگە, مىڭ تەڭگە بولىپ شىعاتىن. قاسىقتارى 700-800-1000 تەڭگەدەن اسىپ كەتسە, سولاي بوپ شىعاتىن. اۋرۋ بولدىق, ىشىمىزدەگى بالامىز ءتۇستى, ءوز-وزىمىزگە قول جۇمساعان كۇن دە بولدى. قان قىسىمىم ءجيى كوتەرىلەدى. قاتتى شارشادىم”, – دەيدى تاراز تۇرعىنى گۇلناز مالىكوۆا.

جابىرلەنۋشىلەر ايس مۇراتوۆاعا كوزسىز سەنبەگەن. ايتۋىنشا, الاياق باستاپقىدا تاۋار جىبەرىپ تۇرعان. وسىلايشا, سۇرانىس ارتقان. ولار ءتىپتى, كوتەرمە ساۋدامەن اينالىسقىسى كەلەتىن وزگە ادامداردان ونلاين تاپسىرىس جيناعان. اقشانى جيناپ العان سوڭ الاياقتار حالىقتى سان سوقتىرعان.

“جان-جاقتان جەپ جاتىر. اقشامىزدى قايتار, ءبىز ايستى تانىمايمىز, ءبىز ساعان سالدىق, سەن اقشانى قايتار بىزگە, قالاي بولسا دا تاۋىپ بەر, قاي كەزدە بەرەسىڭ, كۇندە جازادى, كۇندە تەلەفون سوعادى, تىنىشتىق جوق”, – دەيدى اشىنعان الماتىلىق تۇرعىن.

اقشاسىن قايتارا الماي جۇرگەن حالىق “ايس مۇراتوۆا” دەگەن لاقاپ اتپەن تانىمال ارايلىم قوجامۇراتوۆانىڭ جاقىندارى مەن تۋىستارى دا جازالانسىن دەپ وتىر.

“وزىمدە مىڭ ادام بار. مىڭ ادامينان تاپسىرىس الىپ, ايسقا 100 ميلليوننىڭ ۇستىندە تاۋارعا اقشا وتكىزدىم. اقشانى تەك ءوزى ەمەس, ءبۇتىن تۋما-تۋىسقانى, ىنىلەرىنە جىبەرتكىزدى. ءبارى گەلەندۆاگەن, نەشە ءتۇرلى قىمبات-قىمبات, 60 ميلليون, 130 ميلليوننىڭ كولىگىن ايداپ ءجۇر. ءار ىنىسىنە, اناسىنا ءۇي ساتىپ الىپ بەرگەن”, – دەيدى ورال تۇرعىنى مارينا عاپساتتاروۆا.

كۇدىكتى قازىر ۋاقىتشا ۇستاۋ يزولياتورىندا وتىر. بىلتىر تامىز ايىندا وعان قاتىستى الاياقتىق بويىنشا قىلمىستىق ءىس قوزعالدى. تەرگەۋ جۇمىستارىنىڭ جالعاسىپ جاتقانىنا ءبىر جىلداي ۋاقىت بولدى.

“الماتى پوليتسيا دەپارتامەنتىنىڭ تەرگەۋ باسقارماسى قك 190-بابىنىڭ 4-تارماعى بويىنشا قىلمىستىق ءىستى تەرگەۋدە. اسا ءىرى كولەمدە, الاياقتىق دەرەگى بويىنشا. قىلمىستىق ءىس جۇرگىزۋ كودەكسىمەن كوزدەلگەن بارلىق تەرگەۋ جۇرگىزىلىپ جاتىر”, – دەپ مالىمدەدى الماتى پوليتسيا دەپارتامەنتىنىڭ وكىلى سالتانات ازىربەك.

كۇدىكتىگە الدانعان حالىق الماتى پروكۋرورىنىڭ ورىنباسارى قابىلداۋىندا بولىپ, تالاپ-ارىزدارىن ايتتى. پروكۋرور الاياقتىققا قاتىسى بار ادامداردىڭ ءبىر جازالانادى دەپ ۋادە بەردى.

ايتا كەتەيىك, «كاسىبىمدى جاۋىپ, 52 ميلليون تەڭگە سالدىم» دەپ ايس مۇراتوۆا ەسىمدى كەلىنشەككە الدانعان ءبىر توپ قازاقستاندىق زاڭگەرمەن بىرگە پوليتسيا دەپارتامەنتىنە جينالعان ەدى.