ءار قوناققا ءبىر كىتاپ – ۇزاتۋ تويىنداعى يدەيا كوپشىلىكتى ءسۇيسىنتتى

فوتو: ۆيدەودان سكرينشوت

قىز ۇزاتۋ تويىنىڭ ءار قوناعىنا ارناپ داستارحانعا «سالت-داستۇرلەر سويلەيدى» كىتابىن قويعان توي يەسىنىڭ باستاماسى جۇرتشىلىقتىڭ قولداۋىن تاپتى, دەپ حابارلايدى qandastar.kz Ulysmedia.kz سىلتەمە جاساپ.

بۇل تۋرالى بەلگىلى شىعىستانۋشى, “وتباسى حرەستوماتياسى” جوباسىنىڭ اۆتورى سانجار كەرىمباي ءوزىنىڭ الەۋمەتتىك جەلىدەگى پاراقشاسىندا ءبولىستى.

ارايلىم ەسىمدى قىزدىڭ ۇزاتۋ تويى ەلىمىزدىڭ قاي قالاسىندا وتكەنى بەلگىسىز. اۆتوردىڭ ايتۋىنشا, قىز ۇزاتۋ تويىندا قۋانىش يەسى ءار قوناققا “وتباسى حرەستوماتياسى” جوباسى اياسىندا جارىق كورگەن “سالت-ءداستۇر سويلەيدى” كىتابىنىڭ بىر-ءبىر داناسىن سىيلاعان.

اۆتور ۆيدەودا قازاق قوعامى مادەنيەتتى, وركەنيەتتى قوعامعا اينالىپ كەلە جاتقانىن جەتكىزدى.

“قازىر جۇرت ۇيلەنۋ تويىندا, قىز ۇزاتۋدا قىتايدىڭ تۇككە دە پايداعا اسپايتىن جىلتىراعىن قويمايدى. مىنانداي كىتاپتار قويىپ جاتىر”, دەيدى س.كەرىمباي.

ايتۋىنشا, تويعا 300 ادام شاقىرىلعان, ولاردىڭ ارقايسىسىنا تارتۋ رەتىندە ءبىر-ءبىر كىتاپتان داستارحان باسىنا قويىلعان.

سونداي-اق سانجار كەرىمباي “قازاق قوعامىنىڭ شارۋاسى ءبىتتى, نادان بولدى, كىتاپ وقىمايدى” دەگەن جۇرت ساناسىندا قالىپتاسىپ كەتكەن قوعامدىق پىكىرمەن كەلىسپەيتىنىن تويداعى وسى يگى باستاما ارقىلى ءبىلدىردى.

ال جەلى قولدانۋشىلارىنىڭ باسىم بولىگى بۇل يدەيانىڭ كەرەمەت ەكەنىن ايتىپ, ريزاشىلىعىن بىلدىرگەن.

ءتىپتى كەيبىرى وسى كىتاپتى قايدان الۋعا بولاتىنىن سۇراپ, يگى باستامانى قولداۋعا نيەت تانىتقاندار دا تابىلدى.

دەسە دە پىكىر جازۋشىلاردىڭ اراسىندا قازىر ەشكىم كىتاپ وقىمايتىنىن العا تارتىپ, ءوز ويىن بىلدىرگەندەر دە بار ەكەن.