Ár qonaqqa bir kitap – uzatý toıyndaǵy ıdeıa kópshilikti súısintti

Foto: vıdeodan skrınshot

Qyz uzatý toıynyń ár qonaǵyna arnap dastarhanǵa «Salt-dástúrler sóıleıdi» kitabyn qoıǵan toı ıesiniń bastamasy jurtshylyqtyń qoldaýyn tapty, dep habarlaıdy qandastar.kz Ulysmedia.kz silteme jasap.

Bul týraly belgili shyǵystanýshy, “Otbasy hrestomatııasy” jobasynyń avtory Sanjar Kerimbaı óziniń áleýmettik jelidegi paraqshasynda bólisti.

Araılym esimdi qyzdyń uzatý toıy elimizdiń qaı qalasynda ótkeni belgisiz. Avtordyń aıtýynsha, qyz uzatý toıynda qýanysh ıesi ár qonaqqa “Otbasy hrestomatııasy” jobasy aıasynda jaryq kórgen “Salt-dástúr sóıleıdi” kitabynyń bir-bir danasyn syılaǵan.

Avtor vıdeoda qazaq qoǵamy mádenıetti, órkenıetti qoǵamǵa aınalyp kele jatqanyn jetkizdi.

“Qazir jurt úılený toıynda, qyz uzatýda qytaıdyń túkke de paıdaǵa aspaıtyn jyltyraǵyn qoımaıdy. Mynandaı kitaptar qoıyp jatyr”, deıdi S.Kerimbaı.

Aıtýynsha, toıǵa 300 adam shaqyrylǵan, olardyń árqaısysyna tartý retinde bir-bir kitaptan dastarhan basyna qoıylǵan.

Sondaı-aq Sanjar Kerimbaı “qazaq qoǵamynyń sharýasy bitti, nadan boldy, kitap oqymaıdy” degen jurt sanasynda qalyptasyp ketken qoǵamdyq pikirmen kelispeıtinin toıdaǵy osy ıgi bastama arqyly bildirdi.

Al jeli qoldanýshylarynyń basym bóligi bul ıdeıanyń keremet ekenin aıtyp, rızashylyǵyn bildirgen.

Tipti keıbiri osy kitapty qaıdan alýǵa bolatynyn surap, ıgi bastamany qoldaýǵa nıet tanytqandar da tabyldy.

Dese de pikir jazýshylardyń arasynda qazir eshkim kitap oqymaıtynyn alǵa tartyp, óz oıyn bildirgender de bar eken.