ءبىلىم
«ءار وقۋشىدان 1,5 ملن تەڭگەدەن العان»: اقتاۋدا جەكەمەنشىك ليتسەيدە شۋ شىقتى
فوتو: اشىق دەرەككوز
اقتاۋداعى «عاسىر» ليتسەيىندە داۋلى جاعداي تۋىندادى – جالاقىسىن الا الماعان 25 مۇعالىم جۇمىستان شىعىپ, وقۋشىلاردىڭ كوبى مەكتەپتەن كەتكەن,دەپ حابارلايدى qandastar.kz
ۇستازسىز قالعان ءبىلىم وشاعى اتا-انالاردىڭ اشۋىنا ءتيدى. سەبەبى, وقۋ ورنى باسىندا ۇبت-عا دايىنداپ, شەت ءتىلىن تەرەڭدەتىپ وقىتامىز دەپ سەندىرىپ, ءار وقۋشىدان 1,5 ميلليون تەڭگە العان. بىراق مۇعالىمدەر كەتىپ قالعان سوڭ, ءبىلىم دە, ءتىل ۇيرەنۋ مۇمكىندىگى دە توقتاپ, اتا-انالار اقشاسىن قايتارۋدى تالاپ ەتەدى.
«عاسىر» ليتسەيىندە بەس ايدان بەرى جالاقىسىن الماعان مۇعالىمدەر اقىرى جۇمىستان شىعۋعا ءماجبۇر بولدى. ال بالالارىن «ساپالى ءبىلىم السىن» دەپ جەكەمەنشىك مەكتەپكە بەرگەن اتا-انالار اقشاسىن قايتارا الماي ءجۇر. ولاردىڭ ايتۋىنشا, مەكتەپ باسشىلىعى جالاقىنى ۋاقىتىندا تولەمەگەنى ازداي, الەۋمەتتىك تولەمدەر مەن زەينەتاقى جارنالارىن دا اۋدارماعان.
«قاراشا ايىنان باستاپ مۇعالىمدەردىڭ جالاقى الا الماي جۇرگەنىن ەستي باستادىق. قىزىم دا سىنىپتاعى بالالاردىڭ كەتىپ جاتقانىن ايتتى. باستاپقىدا ءبارى ۇبت-عا دايىندالۋعا كەلگەن ەدى. ءبىز ءۇشىن اعىلشىن ءتىلى ماڭىزدى بولدى, سوندىقتان كۇتىپ كوردىك. بىراق كەيىن «فاۋندەيشن» ساباعىنا دا بارا المايتىنىن ايتتى – سەبەبى مۇعالىم جوق», – دەدى اتا-انالاردىڭ ءبىرى اينۇر سەيداحمەتوۆا.
وسىلايشا, باستاپقىدا ۋادە ەتىلگەن ساپالى ءبىلىم ورنىنا وقۋشىلار ەكى ايدان بەرى دۇرىس ساباق وقىماعان. ونىڭ ۇستىنە, وقۋ جىلىنىڭ ورتاسىندا مەملەكەتتىك مەكتەپتەر دە ولاردى قابىلداۋدان باس تارتۋدا.
مەكتەپتەن كەتكەن 25 ۇستازدىڭ ءبىرى, دەنە شىنىقتىرۋ ءپانىنىڭ مۇعالىمى ناز شافيك جالاقى ماسەلەسى تۋرالى بىلاي دەدى:
«قىركۇيەكتەن بەرى بىزگە ەشقانداي اقشا اۋدارىلعان جوق, بىراق اتا-انالارعا مەكتەپ اكىمشىلىگى مۇعالىمدەرگە جالاقى بەرىلىپ جاتىر دەپ ايتقان. قازىر مەكتەپتە 20 شاقتى عانا مۇعالىم قالدى, ونىڭ ىشىندە ديپلومى جوقتار دا بار. بۇل جەردە ەشقانداي ءبىلىم بەرىلىپ جاتقان جوق».
ونىڭ ايتۋىنشا, جالاقى ۋاقتىلى تۇسپەگەندىكتەن, مەديتسينالىق ساقتاندىرۋ جارنالارى دا اۋدارىلماي, ۇستازدار ەمحانادان تەگىن ەم الا الماي ءجۇر.
كتك ارناسىنا حابارلاعانداي, «عاسىر» ليتسەيىنىڭ نەگىزىن قالاۋشى ياكۋب حالىقبەرديەۆ اتا-انالاردى سابىرعا شاقىرىپ, جاعداي رەتتەلەتىنىن ايتتى:
«مەن بارلىق اتا-انامەن سويلەستىم. ءبىر اپتا ىشىندە ماسەلەنى شەشەمىز. ءبىز الماتىدان باسقا مۇعالىمدەردى شاقىرتىپ جاتىرمىز. دۇيسەنبىدەن باستاپ ساباقتار قايتا جالعاسادى. ءبىزدىڭ ليتسەنزيامىز بار, بارلىق سالىق تولەنگەن, مەكتەپ زاڭ اياسىندا جۇمىس ىستەيدى», – دەدى ول.
اقتاۋ قالاسىنىڭ ءبىلىم ءبولىمى ليتسەيدەگى جاعدايعا بايلانىستى تەكسەرىس باستالعانىن حابارلادى. ولار زاڭ اياسىندا ءتيىستى ورگاندارمەن بىرلەسىپ تەكسەرۋ جۇرگىزەتىنىن مالىمدەدى.
«وقۋشىلار مەملەكەتتىك مەكتەپتەرگە قابىلدانادى, ال جۇمىسسىز قالعان مۇعالىمدەرگە بوس ورىندار ۇسىنىلادى», – دەدى ءبىلىم باسقارماسىنىڭ وكىلدەرى.
