ارام ولتىرمەگەن: سوققان سيىرىن سويىپ, ەتىن سالىپ العان ازامات

قىزىلوردا وبلىسى, جالاعاش اۋدانىندا تاس جولدا كولىك سيىردى قاعىپ كەتكەن. كولىك باسقارعان جۇرگىزۋشى مالدى سول جەردە سويىپ, ەتىن ۇيىنە سالىپ الىپ كەتكەن. ارتىنشا سيىر يەسىمەن داۋ سوتتا مەدياتسيا تارتىبىمەن شەشىلدى, دەپ حابارلايدى Qandastar.kz اقپارات پورتالى.

تاس جولدا بولعان وقيعا

جالاعاش اۋداندىق سوتىنىڭ مالىمەتىنشە, ەر ادام كولىكتى باسقارىپ كەلە جاتىپ, وبلىستىڭ باسقا تۇرعىنىنا تيەسىلى سيىردى قاعىپ كەتكەن. وقيعا جول-كولىك وقيعاسى ساناتىنا جاتقىزىلدى. الايدا جۇرگىزۋشى يەسىنە حابارلاپ, سوتتى كۇتۋدىڭ ورنىنا, سيىردى سول جەردە سويىپ, ەتىن الىپ كەتكەن.

كىم كىنالى: سيىر, شوپىر نەمەسە مال يەسى

جۇرگىزۋشىنىڭ ارەكەتىنەن ەشقانداي اكىمشىلىك قۇقىق بۇزۋشىلىق انىقتالماعاندىقتان, پوليتسيا ءىستى ءتيىستى قاۋلىمەن جاپتى. الايدا جانۋاردىڭ يەسى وقيعانىڭ بۇلاي وربۋىمەن كەلىسپەي, ازاماتتىق ءىس جۇرگىزۋ اياسىندا سوتقا جۇگىنگەن.

ول ءوز تالاپ-ارىزىندا جۇرگىزۋشىدەن 350 مىڭ تەڭگە وتەماقى تولەۋدى تالاپ ەتكەن – ونىڭ ەسەبى بويىنشا سيىردىڭ قۇنى وسىعان تەڭ.

تاراپتار بىتىمگە كەلە الدى ما

سوت تالقىلاۋى بارىسىندا تاراپتار ءوزارا كەلىسىمگە كەلىپ, جانجالدى مەدياتسيا تارتىبىمەن رەتتەۋ تۋرالى شەشىم قابىلدادى. كەلىسسوزدەر بارىسىندا مەدياتسيالىق كەلىسىمگە قول قويىلىپ, ونىڭ اياسىندا جۇرگىزۋشى جابىرلەنۋشىگە وتەماقى رەتىندە 150 مىڭ تەڭگە تولەۋگە مىندەتتەلدى. ورىنداۋدىڭ سوڭعى مەرزىمى – 2025 جىلدىڭ 5 ماۋسىمى.

جاۋاپ رەتىندە تالاپكەر باستاپقىدا مالىمدەگەن سومانى قايتارىپ الىپ, جۇرگىزۋشىگە قويعان تالاپتارىن تولىق كولەمدە الدى.

سوت شەشىمى

سوت داۋدى رەتتەلدى دەپ تانىپ, مەدياتسيالىق كەلىسىمنىڭ تالاپتارىن بەكىتتى. ءىس بويىنشا ءوندىرىس توقتاتىلدى.