«ارامىز الىستاپ كەتتى…». دەپۋتات باپي ساياساتكەر قوسانوۆ تۋرالى

فوتو: Dalanews.kz

تانىمال ساياساتكەر, ءماجىلىس دەپۋتاتى ەرمۇرات باپي بەلدى ساياساتكەر ءامىرجان قوسانوۆپەن اراقاتىناسى تۋرالى ايتتى, – دەپ حابارلايدى  qandastar.kz  Dalanews.kz-كە سىلتەمە جاساپ.

باپي قوسانوۆپەن ارادا الشاقتىق بارىن جاسىرمادى. ساياساتكەر بۇعان نە سەبەپ بولعانىنىڭ دا شەتىن شىعاردى.

ء«امىرجان قوسانوۆتىڭ تاقىرىبى ماعان عانا ەمەس, قوعامعا دا اۋىر تاقىرىپ قوي. 2019 جىلعى سايلاۋدان كەيىن ءامىرجان قوسانوۆتىڭ فەنومەنى پايدا بولدى عوي. ول – بىلىكتى, ساقا ساياساتكەر. سايلاۋداعى جاعدايدىڭ ءبارى بەلگىلى. ونىڭ ءبارىن قايتادان قوپسىتىپ, بىقسىتىپ ايتىپ وتىراتىنداي ەمەس. دەگەنمەن سودان كەيىن كىشكەنە ارامىز الشاقتاپ كەتتى.

جاڭا قازاقستان يدەياسى پرەزيدەنت توقاەۆتىڭ باستاماسى ەمەس, 2019 جىلى سايلاۋعا كەلگەن كەزدە جاڭا قازاقستان دەپ كەلگەنبىز. جاڭا قازاقستان پلاتفورماسىن قۇردىق. جاڭا قازاقستاننىڭ وكىلى ءامىرجان بولدى. بىراق كەيىننەن وسىنداي جاعدايلار بولدى. سايلاۋعا قاتىسقان ازاماتتار ارتىنان ءبىزدى جازعىرىپ شىقتى», – دەدى دەپۋتات «4VLASTINFO» ارناسىنا.

دەگەنمەن باپي مەن قوسانوۆتىڭ اراسىندا تۋىستىق قارىم-قاتىناس بار بولىپ شىقتى.

«توي-تومالاق, قازالى جەرلەردە جولىعامىز عوي. ءبىر-بىرىمىزگە قاس دۇشپاندىعىمىز جوق. 2019 جىلى مەن جسدپ پارتياسىنىڭ توراعاسى بولدىم. ساياسي جاعدايلارعا بايلانىستى ول پارتيانى سايلاۋدان وتپەي قالعان ازاماتپەن ارالاستىرۋعا, جاقىنداستىرۋعا بولمايتىن بولدى. ساياسات دەگەن ءوزى ساسىق دەيدى عوي. سونداي جاعدايلار بولىپ تۇرادى. سول كەزدەن باستاپ ارامىز الشاقتاعانى شىن.

نەمەرەلەس باجامىز. قىزدار (ايەلدەرى – ەسك.) ارالاسىپ, حابارلاسىپ, ءبىر-بىرىنە بارىپ تۇرادى. ال ءوز تاراپىمىزدان ارقايسىنىڭ ساياسي شەشىمىنە, ساياسي تاڭداۋىنا بايلانىستى باعىت-باعدارىمىز وزگەشە بولىپ كەتكەنى شىن», – دەدى ول سۇحباتىندا.

ايتا كەتەيىك, 2019 جىلى «ۇلت تاعدىرى» قوزعالىسى اتىنان سايلاۋعا تۇسكەن ءامىرجان قوسانوۆقا سايلاۋشىلاردىڭ 16,2 پايىزى نەمەسە 1,4 ميلليون ادام داۋىس بەرگەن ەدى. كەيىن سايلاۋدا جەڭىسكە جەتكەن توقاەۆتى قۇتتىقتاعان قوسانوۆتىڭ ارەكەتى كوپشىلىككە جاقپاي قالدى.