«Aramyz alystap ketti…». Depýtat Bapı saıasatker Qosanov týraly

Foto: Dalanews.kz

Tanymal saıasatker, Májilis depýtaty Ermurat Bapı beldi saıasatker Ámirjan Qosanovpen araqatynasy týraly aıtty, – dep habarlaıdy  qandastar.kz  Dalanews.kz-ke silteme jasap.

Bapı Qosanovpen arada alshaqtyq baryn jasyrmady. Saıasatker buǵan ne sebep bolǵanynyń da shetin shyǵardy.

«Ámirjan Qosanovtyń taqyryby maǵan ǵana emes, qoǵamǵa da aýyr taqyryp qoı. 2019 jylǵy saılaýdan keıin Ámirjan Qosanovtyń fenomeni paıda boldy ǵoı. Ol – bilikti, saqa saıasatker. Saılaýdaǵy jaǵdaıdyń bári belgili. Onyń bárin qaıtadan qopsytyp, byqsytyp aıtyp otyratyndaı emes. Degenmen sodan keıin kishkene aramyz alshaqtap ketti.

Jańa Qazaqstan ıdeıasy Prezıdent Toqaevtyń bastamasy emes, 2019 jyly saılaýǵa kelgen kezde Jańa Qazaqstan dep kelgenbiz. Jańa Qazaqstan platformasyn qurdyq. Jańa Qazaqstannyń ókili Ámirjan boldy. Biraq keıinnen osyndaı jaǵdaılar boldy. Saılaýǵa qatysqan azamattar artynan bizdi jazǵyryp shyqty», – dedi depýtat «4VLASTINFO» arnasyna.

Degenmen Bapı men Qosanovtyń arasynda týystyq qarym-qatynas bar bolyp shyqty.

«Toı-tomalaq, qazaly jerlerde jolyǵamyz ǵoı. Bir-birimizge qas dushpandyǵymyz joq. 2019 jyly men JSDP partııasynyń tóraǵasy boldym. Saıası jaǵdaılarǵa baılanysty ol partııany saılaýdan ótpeı qalǵan azamatpen aralastyrýǵa, jaqyndastyrýǵa bolmaıtyn boldy. Saıasat degen ózi sasyq deıdi ǵoı. Sondaı jaǵdaılar bolyp turady. Sol kezden bastap aramyz alshaqtaǵany shyn.

Nemereles bajamyz. Qyzdar (áıelderi – esk.) aralasyp, habarlasyp, bir-birine baryp turady. Al óz tarapymyzdan árqaısynyń saıası sheshimine, saıası tańdaýyna baılanysty baǵyt-baǵdarymyz ózgeshe bolyp ketkeni shyn», – dedi ol suhbatynda.

Aıta keteıik, 2019 jyly «Ult taǵdyry» qozǵalysy atynan saılaýǵa túsken Ámirjan Qosanovqa saılaýshylardyń 16,2 paıyzy nemese 1,4 mıllıon adam daýys bergen edi. Keıin saılaýda jeńiske jetken Toqaevty quttyqtaǵan Qosanovtyń áreketi kópshilikke jaqpaı qaldy.