ءاربىر ءۇشىنشى قازاقستاندىق ءوزىنىڭ تابىسىن جاسىرادى

فوتو: اشىق دەرەككوز

ءاربىر ءۇشىنشى قازاقستاندىق ءوزىنىڭ تابىسىن جاسىرادى, دەپ جازدى qandastar.kz

ولار بەيرەسمي جۇمىس ىستەپ, ناتيجەسىندە الەۋمەتتىك كەپىلدىكتەردەن قاعىلىپ وتىر. بۇل ەڭبەك قۇقىقتارىنىڭ قورعالماۋى, بولاشاقتا زەينەتاقىنىڭ ءتيىستى دەڭگەيگە جەتپەۋى سەكىلدى قاۋىپ-قاتەرلەرگە اكەلەدى. Adam Research ساراپشىلارىنىڭ زەرتتەۋىنە سۇيەنگەن Energyprom سايتى وسىلاي دەپ جازدى. الەۋمەتتىك ساۋالناما ناتيجەسى رەسپوندەنتتەردىڭ 36,4%-ى رەسمي ەمەس جۇمىسپەن قامتىلعانىن كورسەتىپ وتىر. بۇل كورسەتكىش ايەلدەرگە قاراعاندا ەرلەر اراسىندا جوعارى.

atamekenbusiness_qaz حابارلاعانداي, قىزمەتكەرلەردىڭ 16,6%-ى جالاقىنى كونۆەرتپەن السا, 13,6%-ى كولەڭكەلى بيزنەسپەن اينالىسقان. تاعى 6%-ىندا تۇراقتى جۇمىسى بولماعان. بۇل رەتتە رەسمي جۇمىسقا تۇرماعانداردىڭ ورتاشا تابىسى 100 مىڭ تەڭگەگە دە جەتپەيتىن كورىنەدى. الايدا كولەڭكەلى بيزنەستە جۇرگەندەردە بۇل كورسەتكىش بىرنەشە ەسە اسىپ تۇسكەن. كونۆەرتپەن جالاقى الاتىندار تابىسى قاجەتتىلىككە جەتپەيتىنىن ايتقان. رەسمي مالىمەتتەرگە سايكەس, بىلتىر ەلىمىزدە 1,2 ميلليون ادام بەيرەسمي جۇمىسپەن قامتىلعان.