جاڭالىقتار
ارداگەر جۋرناليست الاياقتارعا الدانىپ, ءۇيىن ساتىپ جىبەرگەن
فوتو: الەۋمەتتىك جەلىدەن
جۋرناليست ايبار ولجاەۆ ءوزىنىڭ Facebook-تەگى پاراقشاسىندا فيلولوگيا عىلىمدارىنىڭ دوكتورى, پروفەسسور كاكەن قامزيننىڭ الاياقتارعا الدانىپ قالعانىن ايتتى, دەپ حابارلايدى Qandastar.kz.
ونىڭ ايتۋىنشا, الاياقتار ارداگەر جۋرناليست, پروفەسسوردىڭ سەنگىشتىگىن پايدالانىپ كينوداعىداي ارەكەت ەتكەن. الدىمەن, «ەنەرگوسبىت» ادامدارى رەتىندە حابارلاسىپ, مەكەن جايى, جسن, پاتەرى تۋرالى اقپاراتتى ءبىلىپ العان. ارتىنان ۇلتتىق قاۋىپسىزدىك كوميتەتىنىڭ اتىن جامىلىپ حابارلاسىپ, بىرەۋلەردىڭ ءۇيىن تارتىپ الايىن دەپ تۇرعانىن ايتىپ, تەز ءۇيىن ساتۋعا كوندىرىپ, ال اقشانى ۇلتتىق بانكتىڭ ارنايى شوتىندا ساقتايسىز دەپ الداعان. پروفەسسور نوتاريۋس ارقىلى ءۇيىن ساتىپ, اقشانى الاياقتار جىبەرگەن كۋرەرگە بەرە سالعان.
ايبار ولجاەۆ وسى ماسەلەگە قاتىستى بىرقاتار سالالىق مامانداردى پروفەسسورعا قول ۇشىن بەرۋگە شاقىردى.
«قازىر الماتى قالاسى اۋەزوۆ اۋداندىق پوليتسيا دەپارتامەنتىندە قىلمىستىق ءىس قوزعالدى. الماتى قالاسىنىڭ پوليتسيا دەپارتامەنتى وسى رەزونانستى ىسكە بارىنشا جۇمىلۋدى سۇرايمىن. ىشكى ىستەر ءمينيسترى, قۇرمەتتى ەرجان سادەنوۆ وسى ءىستى جەكە باقىلاۋعا الساڭىز نۇر ۇستىنە نۇر بولار ەدى. سوت ارقىلى ءۇيدى ساتۋ مامىلەسىن زاڭسىز دەپ تانۋ ءۇشىن ادۆوكاتتاردىڭ كومەگى كەرەك. سىيلايتىن اعامىز ابزال قۇسپان كاسىبي كەڭەس بەرسە ۇلكەن كومەك بولادى. پارلامەنت دەپۋتاتتارى, پروفەسسور شاكىرتتەرى جاناربەك ءاشىمجان, نارتاي سارسەنگاليەۆ, ماقسات تولىقباي, اردا جۋرناليست ەرمۋرات باپي وسى ءىستى نازارعا الىپ, ۇلكەن رەزونانس تۋعىزسا پروفەسسوردى قورعاي الامىز. دال قازىر كاكەن قامزين جالعىز, ۇيىندە بارريكادا قۇرىپ, بەكىنىپ جاتىر. پاتەردى ساتىپ العاندار كەشكە, تۇندە كەلىپ قوقان-لوققى كورسەتۋدە. ءىس ناسىرعا شاۋىپ بارادى», — دەپ جازدى ول.
