«Artynda qyzdyń músini baıqalady»: Aqnárdiń 7-qabattan qulaǵan sáti beınekameraǵa túsip qalǵan

Belgili jýrnalıst Rýslan О́tepbaı qoǵamda rezonans týdyrǵan Aqnár esimdi boıjetkenniń ólimi jaıly tyń derekti aıtty, dep habarlaıdy qandastar.kz

Aıtýynsha, bir jyl buryn oryn alǵan oqıǵa beınekameraǵa túsip qalǵan.

«2024 jyldyń 20-shy shildesinde kópqabatty turǵyn úıdiń 7 qabatynan Aqnár esimdi boıjetken qulap ketedi. 21 jasar Aqnár sekirip kete me, álde sharasyz qyzdy ózge bireý qasaqana ıterip jibere me? Aqnár 7 qabattan 02:54 shamasynda qulaıdy. Sol sát beınebaqylaý kamerasyna túsip qalǵan. Jazbany maksımaldy túrde úlkeıtttik. Vıdeoǵa qarasaq terezeniń qasynda turǵan qyzdyń músinin baıqaýǵa bolady. Ol qyz Aqnárdiń artynda ne istep tur? Jumbaqty taıaýda sheshemiz», — dedi ol.

Skifnews.kz aqparat portaly jazǵandaı, Rýslan О́tepbaı Aqnárdiń telefonynan jedel járdemge 3 ret qońyraý túskendigin jáne oqıǵa qalaı órbigenin de anyqtaǵan.

«20:44:-te Aqnár men Ranna lıftke kiredi. Lıftten 20:45-te shyǵyp, Dıdar degen qyzdyń páterine barady. Arada 6 saǵat ótken soń, túngi 02:00-de Aqnárdiń telefonynan anasyna qońyraý túsedi. Anasy qaıta habarlasqan kezde tutqany eshkim kótermeıdi. Al 02:30-da Aqnárdiń nómirinen beınejazba keledi. Vıdeoda Aqnár jerde jatady, ústinde Ranna degen qyz áldeneni aıtyp, qoldaryn qysyp alǵan. Vıdeony taspalaǵan úshinshi qyz. Esimi Dıdar. Vıdeony kórgen anasy Aqnárǵa qaıta-qaıta qońyraý shalady. Eshkim kótermeıdi. Týystary da habarlasady. Jaýap bolmaıdy. Eki qyzdyń bireýi jedel-járdemge úsh ret qońyraý shalady. Jedel-járdemge kelip túsken baılanys boıynsha mátini mynadaı: bir qyz esinen tanyp jatyr! Sodan 02:52-de Aqnárdiń telefonynan anasyna taǵy bir vıdeo keledi. Vıdeoda bir qyzdyń shyńǵyrǵan daýsy estiledi. Araǵa 2 mınýt salyp, 02;54-te Aqnár jerge qulaıdy. Al qyzdar túk bolmaǵandaı páterdiń ishinde otyra beredi», dedi Rýslan О́tepbaı.