ارۋاقپەن ويناپ, باسىن ويىپ العان: زەينەپ احمەتوۆا «ەل ارناداعى» باعدارلامانى سوتقا بەرمەك

وتاندىق «ەل ارنا» تەلەارناسىنداعى «قىزدار مەن جىگىتتەر» باعدارلاماسىندا تۇرسىنبەك قاباتوۆتىڭ ايەلى ءمولدىر مۇقان اتى اڭىزعا اينالعان داڭقتى باتىر, حالىق قاھارمانى باۋىرجان مومىش ۇلىن ويىنعا اينالدىردى. شوۋ-بيزنەس وكىلدەرىنىڭ ەرسى ارەكەتىن باۋىرجان مومىش ۇلىنىڭ كەلىنى زەينەپ احمەتوۆا قاتتى سىنعا الىپ, نارازىلىعىن ءبىلدىردى, دەپ حابارلايدى Egemen.kz.

Azattyq Rýhy جازعانداي, زەينەپ احمەتوۆا ءسوز باسىندا تەلەارنادا كورگەن ءۇزىندى جۇرەگىنە قاتتى باتقانىن جەتكىزدى.

«تاۋەلسىزدىك, ەركىندىك, ءسوز بوستاندىعى دەپ كەيبىرەۋلەر اۋزىنا كەلگەنىن ايتىپ, ويىنا كەلگەنىن سويلەپ, بەيباستىققا بارىپ ءجۇر. ادامنىڭ جانى تۇرشىگەتىن, جان-دۇنيەڭدى قۇلازىتاتىن حاباردى جاناشىر كىسىلەردىڭ ءبىرى جىبەرىپ وتىر. قازاقستانعا بەلگىلى اتامىزدىڭ تىكەسىنەن تىك تۇرعان سۋرەتىنىڭ باسىن ويىپ, ءبىر ايەل ادام سول جەرگە باسىن سۇعىپ تۇر. وعان اينالاسىنداعىلار تىرقىلداپ ك ۇلىپ, ءماز بولىپ وتىر. بۇل نە دەگەن باسسىزدىق, نە دەگەن تەكسىزدىك?! ارۋاقپەن ويناپ, اتانىڭ ارۋاعىن تاپتاپ, باسىن ج ۇلىپ الۋعا كىم ولارعا مۇنداي قۇقىق بەرىپ وتىر?

اراسىندا ءبىر دەپۋتات بار. ول نە ءۇشىن ىرجىڭداپ تۇر? حالىقتىڭ كوزى, قۇلاعى, ءتىلى بولادى دەپ سەنگەن حالىق قالاۋلىسىنىڭ سيقى سول بولسا, جەتىسكەن ەكەنبىز. «ءاي, ءتايت» دەۋگە ونىڭ شاماسى كەلگەن جوق. اناۋ ىرجاقايلارمەن بىرگە ىرجالاڭداپ تۇردى. ەت ساسىسا, تۇز سالادى, تۇز ساسىسا, نە سالادى دەمەكشى, دەپۋتاتتىڭ سيقى وسى بولسا, ودان نە ءۇمىت, نە قايىر?» – دەپ زەينەپ احمەتوۆا اشۋىن ءبىلدىردى.

ايتا كەتەيىك, باعدارلامادا كوماندالاردىڭ بىرىندە ءماجىلىس دەپۋتاتى داۋلەت مۇقاەۆ قاتىستى.

اتى اڭىزعا اينالعان باتىردىڭ كەلىنى بۇل ءىستى جاي قالدىرمايتىنىن, سوتقا دەيىن باراتىنىن ايتتى.

«ال ەندى وسى حاباردى جاساپ وتىرعان جاپ-جاس كىسىلەر تيتتەي دە بولسىن, ويلانعان جوق پا? قۇدايدان قالاي قورىققان جوق? ارۋاقتان قالاي سەسكەنگەن جوق? ولار ۇلكەندى سىيلاۋدى, اسىرەسە ارۋاقتى سىيلاۋدى ۇيرەنگەن جوق پا? باسىنان باستاپ ۋىزىنا جارىماعان بەيشارالار ءوزىنىڭ تاريحىنا ءوزى تۇكىرىپ وتىر. ۇلى ادامداردى اياققا تاپتاپ وتىر. ال بۇل جاقسىلىققا اپارمايدى.

ول قۇرداسى ما نەمەسە جولداسى ما ەدى? باسقا ادام تابىلماي قالدى ما? ول سۋرەت بۇكىل قازاقستانعا بەلگىلى. الماتىعا جولى تۇسكەن كىسىلەر ادەيىلەپ ۇيگە كەلىپ, سۋرەتكە ءتاۋ ەتىپ, سۋرەتكە ءتۇسىپ, ەسكەرتكىش رەتىندە الىپ كەتەدى. بۇل – بالالارىن الىپ كەلىپ, ەرتەڭگى كۇنى اتاسىنىڭ قاسىندا تۇسكەنىن, سول شاڭىراقتا بولعانىن كورسەتۋ ءۇشىن اتۋىرلەيتىن سۋرەت.

ەگەر تۇپتەپ بارار بولساق, سوتقا بەرۋگە بولادى. ول كىسى قازاقتىڭ ار-نامىسىن تۋ ەتىپ ۇستاعان, ۇلتتىق رۋحتىڭ سيمۆولى بولادى. سونى تۇسىنبەگەن مىنا جاستار ەرتەڭگى كۇنى ەلگە بىرنارسە بەرەدى دەگەنگە سەنبەيمىن. مەن ولاردى ءتىپتى اتا-انادان تاربيە كورمەگەن, تەكسىز دەپ ويلايمىن. وزگەسى وزگە, باقيلىق بولعان ارۋاقتاردى, ونىڭ ۇستىنە بۇكىل حالىق قادىرلەيتىن ۇلى تۇلعالارىن مازاقتاۋ ەشكىمدى ەشقاشان جاقسىلىققا اپارمايدى. ءبىر كۇن بولماسا ءبىر كۇنى وماقاسىپ, قابىرعالارى قاۋساپ ءتۇسۋى مۇمكىن. ءوسىپ كەلە جاتقان بالا-شاعالارى بار. نەگە قۇدايدان قورىقپايدى?! مەن بۇل ءىستى جاي قالدىرا المايمىن. ويتكەنى ۇلتتىڭ ۇلى ادامىن قورلاپ وتىر. ەندى كەلىپ, بولاشاعى الدا جاپ-جاس قىز-كەلىنشەكتەر سول اتانىڭ باسىن ويىپ, ج ۇلىپ الىپ, وعان ايەلدىڭ باسىن تىعىپ «مىناۋ كىم?» دەپ سوعان ىرجالاقتاپ ك ۇلىپ وتىر? ارۋاق ەشقاشان كەشىرمەيدى», – دەدى ول.

ول ءسوزىن جالعاي وتىرىپ, وسى ىستەن كەيىن اتاسى باۋىرجان مومىش ۇلىنىڭ ەسكەرتكىشىنە ارنايى كەلىپ, تاعزىم ەتىپ, كەشىرىم سۇراعانىن ايرىقشا اتاپ ءوتتى.

«پانفيلوۆ پاركىندەگى اتانىڭ تاس ەسكەرتكىشىنە كەلىپ, باسىمدى ءيىپ, سالەم سالىپ, اتادان كەشىرىم سۇرادىم. ويتكەنى اتانىڭ الدىندا كەشىرىلمەس كۇناعا باتقان ادامدار بار. جاناشىر كىسىلەر اتانىڭ سۋرەتىن قالاي قورلاپ وتىرعاندارىن كورسەتتى. شىداي الماي, كوزىمنەن جاس پارلاپ, جانىم تۇرشىكتى. سەبەبى, اتا – التى الاشتىڭ قادىرلىسى, ءيىسى قازاققا ورتاق ۇلى تۇلعا, ۇلتتىڭ رۋحاني ار-نامىسى بولعان, سونىڭ سيمۆولى رەتىندە ەلگە بەلگىلى ەرەكشە ادام», – دەپ زەينەپ احمەتوۆا ونەر سالاسىنىڭ ادامدارىنا, باعدارلاما باسشىلىعىنا رەنىشىن ءبىلدىردى.