Árýaqpen oınap, basyn oıyp alǵan: Zeınep Ahmetova «El arnadaǵy» baǵdarlamany sotqa bermek

Otandyq «El arna» telearnasyndaǵy «Qyzdar men jigitter» baǵdarlamasynda Tursynbek Qabatovtyń áıeli Móldir Muqan aty ańyzǵa aınalǵan dańqty batyr, Halyq qaharmany Baýyrjan Momyshulyn oıynǵa aınaldyrdy. Shoý-bıznes ókilderiniń ersi áreketin Baýyrjan Momyshulynyń kelini Zeınep Ahmetova qatty synǵa alyp, narazylyǵyn bildirdi, dep habarlaıdy Egemen.kz.

Azattyq Rýhy jazǵandaı, Zeınep Ahmetova sóz basynda telearnada kórgen úzindi júregine qatty batqanyn jetkizdi.

«Táýelsizdik, erkindik, sóz bostandyǵy dep keıbireýler aýzyna kelgenin aıtyp, oıyna kelgenin sóılep, beıbastyqqa baryp júr. Adamnyń jany túrshigetin, jan-dúnıeńdi qulazytatyn habardy janashyr kisilerdiń biri jiberip otyr. Qazaqstanǵa belgili Atamyzdyń tikesinen tik turǵan sýretiniń basyn oıyp, bir áıel adam sol jerge basyn suǵyp tur. Oǵan aınalasyndaǵylar tyrqyldap kúlip, máz bolyp otyr. Bul ne degen bassyzdyq, ne degen teksizdik?! Árýaqpen oınap, Atanyń árýaǵyn taptap, basyn julyp alýǵa kim olarǵa mundaı quqyq berip otyr?

Arasynda bir depýtat bar. Ol ne úshin yrjyńdap tur? Halyqtyń kózi, qulaǵy, tili bolady dep sengen halyq qalaýlysynyń sıqy sol bolsa, jetisken ekenbiz. «Áı, táıt» deýge onyń shamasy kelgen joq. Anaý yrjaqaılarmen birge yrjalańdap turdy. Et sasysa, tuz salady, tuz sasysa, ne salady demekshi, depýtattyń sıqy osy bolsa, odan ne úmit, ne qaıyr?» – dep Zeınep Ahmetova ashýyn bildirdi.

Aıta keteıik, baǵdarlamada komandalardyń birinde Májilis depýtaty Dáýlet Muqaev qatysty.

Aty ańyzǵa aınalǵan batyrdyń kelini bul isti jaı qaldyrmaıtynyn, sotqa deıin baratynyn aıtty.

«Al endi osy habardy jasap otyrǵan jap-jas kisiler tıtteı de bolsyn, oılanǵan joq pa? Qudaıdan qalaı qoryqqan joq? Árýaqtan qalaı seskengen joq? Olar úlkendi syılaýdy, ásirese árýaqty syılaýdy úırengen joq pa? Basynan bastap ýyzyna jarymaǵan beısharalar óziniń tarıhyna ózi túkirip otyr. Uly adamdardy aıaqqa taptap otyr. Al bul jaqsylyqqa aparmaıdy.

Ol qurdasy ma nemese joldasy ma edi? Basqa adam tabylmaı qaldy ma? Ol sýret búkil Qazaqstanǵa belgili. Almatyǵa joly túsken kisiler ádeıilep úıge kelip, sýretke táý etip, sýretke túsip, eskertkish retinde alyp ketedi. Bul – balalaryn alyp kelip, erteńgi kúni atasynyń qasynda túskenin, sol shańyraqta bolǵanyn kórsetý úshin átýirleıtin sýret.

Eger túptep barar bolsaq, sotqa berýge bolady. Ol kisi qazaqtyń ar-namysyn tý etip ustaǵan, ulttyq rýhtyń sımvoly bolady. Sony túsinbegen myna jastar erteńgi kúni elge birnárse beredi degenge senbeımin. Men olardy tipti ata-anadan tárbıe kórmegen, teksiz dep oılaımyn. О́zgesi ózge, baqılyq bolǵan árýaqtardy, onyń ústine búkil halyq qadirleıtin uly tulǵalaryn mazaqtaý eshkimdi eshqashan jaqsylyqqa aparmaıdy. Bir kún bolmasa bir kúni omaqasyp, qabyrǵalary qaýsap túsýi múmkin. О́sip kele jatqan bala-shaǵalary bar. Nege Qudaıdan qoryqpaıdy?! Men bul isti jaı qaldyra almaımyn. О́ıtkeni ulttyń uly adamyn qorlap otyr. Endi kelip, bolashaǵy alda jap-jas qyz-kelinshekter sol Atanyń basyn oıyp, julyp alyp, oǵan áıeldiń basyn tyǵyp «mynaý kim?» dep soǵan yrjalaqtap kúlip otyr? Árýaq eshqashan keshirmeıdi», – dedi ol.

Ol sózin jalǵaı otyryp, osy isten keıin atasy Baýyrjan Momyshulynyń eskertkishine arnaıy kelip, taǵzym etip, keshirim suraǵanyn aıryqsha atap ótti.

«Panfılov parkindegi atanyń tas eskertkishine kelip, basymdy ıip, sálem salyp, atadan keshirim suradym. О́ıtkeni atanyń aldynda keshirilmes kúnáǵa batqan adamdar bar. Janashyr kisiler atanyń sýretin qalaı qorlap otyrǵandaryn kórsetti. Shydaı almaı, kózimnen jas parlap, janym túrshikti. Sebebi, Ata – alty alashtyń qadirlisi, ıisi qazaqqa ortaq uly tulǵa, ulttyń rýhanı ar-namysy bolǵan, sonyń sımvoly retinde elge belgili erekshe adam», – dep Zeınep Ahmetova óner salasynyń adamdaryna, baǵdarlama basshylyǵyna renishin bildirdi.