«Árýaqpen oınap, basyn oıyp alǵan»: Zeınep Ahmetova otandyq baǵdarlamany sotqa beretinin aıtty

Otandyq «El arna» telearnasyndaǵy «Qyzdar men jigitter» baǵdarlamasy aty ańyzǵa aınalǵan dańqty batyr, Halyq qaharmany Baýyrjan Momyshulynyń tulǵasy beınelengen bannerdi qoıyp, «kim ekenin tap» dep oıynǵa aınaldyrǵany jelide qyzý talqylanyp jatyr,-dep habarlaıdy Qandastar.kz

Bul jaıt Momyshulynyń kelini Zeınep Ahmetovanyń ashýyna tıip, búginde ol atalmysh baǵdarlamany sotqa beretinin jetkizdi.

Baǵdarlama ár jeksenbide efırge shyǵady. Oǵan deıin telearna áleýmettik jelidegi resmı paraqshasynda kelesi baǵdarlamanyń tızerin jarııalaıdy.

Shart boıynsha oıynǵa qatysqan shoý-bıznes ókili tulǵa beınelegen bannerge basyn qoıyp, onyń kim ekenin tabýy kerek. Bul jolǵy baǵdarlama tızerinde Halyq qaharmany Baýyrjan Momyshulynyń tulǵasy beınelengen bannerdi qoıyp, júrgizýshiler men qatysýshynyń ony kelemejge aınaldyrǵany jeli qoldanýshylarynyń shamyna tıgen. «Basqa oınaıtyn adam qalmaǵandaı… Baýyrjan atamyz oıynshyq boldy ma? Ol jerge Tursynbekti qoıýy kerek edi. Baýyrjan atamyz mazaq bolýy úshin soǵysqa attanǵan ba?», – dep jazǵan pikir qaldyrýshylar.

Táýelsizdik, erkindik, sóz bostandyǵy dep keıbireýler aýzyna kelgenin aıtyp, oıyna kelgenin sóılep, beıbastyqqa baryp júr. Adamnyń jany túrshigetin, jan-dúnıeńdi qulazytatyn habardy janashyr kisilerdiń biri jiberip otyr. Qazaqstanǵa belgili atamyzdyń tikesinen tik turǵan sýretiniń basyn oıyp, bir áıel adam sol jerge basyn suǵyp tur. Oǵan aınalasyndaǵylar tyrqyldap kúlip, máz bolyp otyr. Bul ne degen bassyzdyq, ne degen teksizdik?! Árýaqpen oınap, Atanyń árýaǵyn taptap, basyn julyp alýǵa kim olarǵa mundaı quqyq berip otyr?» – dep Zeınep Ahmetova ashýyn bildirdi.

Aty ańyzǵa aınalǵan batyrdyń kelini bul isti jaı qaldyrmaıtynyn, sotqa deıin baratynyn aıtty. «Al endi osy habardy jasap otyrǵan jap-jas kisiler tıtteı de bolsyn, oılanǵan joq pa? Qudaıdan qalaı qoryqqan joq? Árýaqtan qalaı seskengen joq? Olar úlkendi syılaýdy, ásirese árýaqty syılaýdy úırengen joq pa? Basynan bastap ýyzyna jarymaǵan beısharalar óziniń tarıhyna ózi túkirip otyr. Uly adamdardy aıaqqa taptap otyr. Al bul jaqsylyqqa aparmaıdy. Ol qurdasy ma nemese joldasy ma edi? Basqa adam tabylmaı qaldy ma? Ol sýret búkil Qazaqstanǵa belgili. Almatyǵa joly túsken kisiler ádeıilep úıge kelip, sýretke táý etip, sýretke túsip, eskertkish retinde alyp ketedi. Bul – balalaryn alyp kelip, erteńgi kúni atasynyń qasynda túskenin, sol shańyraqta bolǵanyn kórsetý úshin átýirleıtin sýret. Eger túptep barar bolsaq, sotqa berýge bolady. Ol kisi qazaqtyń ar-namysyn tý etip ustaǵan, ulttyq rýhtyń sımvoly bolady», – dedi batyrdyń kelini.