ارىستانبەك مۇحامەدي ۇلى اشتىق جاريالادى ما?

فوتو: ارتەم چۋرسينوۆ

ەكس-مينيستر Facebook پاراقشاسىندا سوت بيلىگىنىڭ ارەكەتتەرىنە قارسى ەكەنىن جەتكىزدى, دەپ جازدى qandastar.kz

«مەن, مۇحامەدي ۇلى ارىستانبەك, سوت بيلىگىنىڭ وزبىرلىعى مەن زاڭسىز ارەكەتتەرىنە نارازىلىق ءبىلدىرىپ, ولمەيىنشە اشتىق جاريالايمىن», – دەلىنگەن حابارلامادا.

اقمولا وبلىسى بويىنشا قىلمىستىق اتقارۋ جۇيەسى دەپارتامەنتى اشتىق جاريالاۋ تۋرالى اقپارات شىندىققا جاناسپايتىنىن مالىمدەدى.

«ول تاماق ءىشىپ جاتىر, بۇل بەينەباقىلاۋ كامەرالارى ارقىلى راستالعان. ودان ەشقانداي ارىز دا, شاعىم دا بولعان جوق. سونىمەن قاتار بەلگىلەنگەن تارتىپپەن سوتتالۋشى ۇيالى تەلەفون قولدانا المايدى. بۇل رەتتە ونىڭ اتىنا الەۋمەتتىك جەلىدە جاريالانعان جاريالانىم بويىنشا تەرگەۋ جۇرگىزىلىپ جاتىر”, – دەپ مالىمدەدى قىلمىستىق اتقارۋ جۇيەسى دەپارتامەنتىنىڭ ءباسپاسوز قىزمەتى.

دەپارتامەنت جالعان اقپارات ۇشىن جاۋاپكەرشىلىك قاراستىرىلعانىن ەسكەرتتى.

ەسكە سالايىق, بۇعان دەيىن ەكس-مينيستر مۇحامەدي ۇلىنا تيەسىلى قۇنى 1,2 ميلليارد تەڭگەگە باعالانعان مەكتەپ مەملەكەتكە قايتارىلعانىن جازعان ەدىك. الماتى پروكۋراتۋراسىنىڭ مالىمەتىنشە, مەكتەپ قۇنى 1,2 ميلليارد تەڭگە. بىر جىلدان اسا ۋاقىت تەرگەلگەن ارىستانبەك مۇحامەدي ۇلى سوت ۇكىمىمەن 8 جىلعا باس بوستاندىعىنان ايىرىلعان ەدى. ارتىنشا «ديپلومات» قوناقۇيىن رەيدەرلىك جولمەن تارتىپ الدى دەگەن قوسىمشا ايىپ تاعىلدى. ميللياردتاعان قارجى جىمقىرىپ, جەكەمەنشىك مەكتەپتى زاڭسىز يەمدەندى دەپ ايىپتالعان ارىستانبەك مۇحامەدي ۇلى 11 جىلعا سوتتالعان ەدى. وعان ەكى ەپيزودتى قامتيتىن قىلمىستىق ءىس بويىنشا ۇكىم شىقتى.