ارىستانبەك مۇحامەدي ۇلىنىڭ ايەلى بوستاندىققا شىعاتىن بولدى

فوتو: سكرينشوت

ديماش مۇحامەدي ۇلى ءبىر جىل زاڭسىز ۇيقاماقتا وتىرعان اناسىنا اراشا ءتۇسىپ, سوتتان ونىڭ زەينەت جاسىنداعى ادام ەكەنىن ەسكەرۋىن سۇرادى.

اپەللياتسيالىق القا سوتتالعان ەكس-مادەنيەت ءمينيسترى ارىستانبەك مۇحامەدي ۇلىنىڭ اسا ءىرى كولەمدە پارا الۋعا ارەكەتتەنۋ ءىسى بويىنشا شاعىمىن قارادى, دەپ حابارلادى turkystan.kz سايتى stan.kz-كە سىلتەمە جاساپ.
«ايىپتاۋ اكتىسى مەن ۇكىمنىڭ قيسىنسىز بولجام نەگىزىندە جاسالعان. سونداي-اق سوتتالۋشى ەرلى-زايىپتىلاردىڭ كۋالىگىنە نەگىزدەلگەن ال بۇل قىلمىستىق پروتسەسسۋالدىق كودەكستىڭ 112-بابىنا قايشى كەلەدى», – دەپ مالىمدەدى سوتتالۋشىنىڭ ادۆوكاتى مەن ايەلى.

سوت وتىرىسىندا ارىستانبەك مۇحامەدي ۇلىنىڭ ۇلى ديماش مۇحامەدي ۇلى دا ءسوز سويلەدى. ايتۋىنشا, اكەسى قاماۋدا وتىرعالى ونىڭ وتباسى كۇندىز كۇلكىدەن, تۇندە ۇيقىدان ايىرىلعان. سوتتالۋشى ءوزىنىڭ تۇڭعىش نەمەرەسىن دە كورمەگەن. ول ءبىر جىل زاڭسىز ۇيقاماقتا وتىرعان اناسىنا اراشا ءتۇسىپ, سوتتان ونىڭ زەينەت جاسىنداعى ادام ەكەنىن ەسكەرۋىن سۇرادى.
«اتا-انام بۇكىل سانالى عۇمىرىن قازاقستاننىڭ مادەنيەت, سپورت, تۋريزم جانە ءبىلىم سالالارىنداعى دامۋىنا ارنادى», – دەيدى ديماش مۇحامەدي ۇلى.

قورعاۋشىلار ءىس بويىنشا سوڭعى بەنەفيتسيار, پارا الۋشى جانە جابىرلەنۋشى تاراپتىڭ انىقتالماعانىن اتاپ ءوتتى. ولار سوتتالعانداردىڭ بارلىعىن اقتاۋدى سۇرادى. الايدا پروكۋرور بارلىق ايتىلعان ۋاجدەر ءبىرىنشى ساتىداعى سوت شەشىمىن بۇزۋعا نەگىز بولا المايتىنىن العا تارتتى. سونداي-اق ول كەلتىرىلگەن دالەلدەر سوت وتىرىسىندا تالقىلانىپ, ءتيىستى باعا بەرىلگەنىن ەسكە سالدى.

«عاليا ىسقاقوۆانىڭ قىلمىستىق كودەكستىڭ 368-بابى 1-بولىگى بويىنشا («پاراقورلىققا دەلدال بولۋ») ارەكەتى قىلمىستىق كودەكستىڭ 24-بابى, 3-بولىگىنە («قىلمىس جاساۋعا وقتالۋ») اۋىستى. عاليا ىسقاقوۆاعا ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلىپ, التى ايعا باس بوستاندىعىنان ايىرۋ جازاسى تاعايىندالدى. ىسقاقوۆانىڭ 2023 جىلدىڭ 5 شىلدەسىنەن باستاپ ۇيقاماقتا وتىرعانى, ۇيقاماقتاعى ءبىر كۇندى تۇزەۋ مەكەمەسىنىڭ ەكى كۇنىنە تەڭ كەلەتىنىن ەسكەرىپ, 6 ايعا سوتتالعان ىسقاقوۆانىڭ جازاسى وتەلگەن دەپ سانالادى», – دەدى سۋديا ەرعاليەۆ.
ۇكىمنىڭ باسقا بولىگى وزگەرىسسىز قالادى. سوتتالعاندار مەن ولاردىڭ ادۆوكاتتارىنىڭ ءوتىنىشى قاناعاتتاندىرىلمايتىن بولدى.

بۇعان دەيىن اپەللياتسيالىق سوت ارىستانبەك مۇحامەدي ۇلىنىڭ ءىسىن قاراپ جاتقانى تۋرالى جازعان ەدىك.