«اسفالت شەنەۋنىك تۇراتىن كوشەدە عانا بار»: اتىراۋدا تۇرعىندار جولدىڭ جوقتىعىنا نارازى

اتىراۋ قالاسىندا تۇرعىندار شەنەۋنىكتى ءوزى تۇراتىن كوشەگە تەپ-تەگىس اسفالت توسەپ, قالعان كوشەلەرگە كوڭىل بولمەي وتىرعانىنا شاعىمدانۋدا, دەپ حابارلايدى Qandastar.kz اقپارات پورتالى 31-ارنانىڭ “ينفورمبيۋرو”جاڭالىقتار باعدارلاماسىنا سىلتەمە جاساپ. 

تۇرعىنداردىڭ ايتۋىنشا, ءبىر ىقشاماۋداندا ەكى ءتۇرلى كورىنىس. ءبىر جاعى شۇرىق-تەسىك بولسا, ەندى بىرىندە ءتۇپ-ءتۇزۋ اسفالت.

“سىزدەرگە جول جوق دەپ قاعازىن جاۋىپ تاستادى. ارتىنشا, ءبىر دەمالىس وتپەي ءوزى 24-ءشى كوشەدە تۇرادى ەكەن, شاۋىپ ءجۇر. جول سالۋعا جانتالاسىپ ءجۇر, ءوزىنىڭ كوشەسىنە. وندا ءبارىمىز سولاي اكىمدىككە جۇمىس جاسايىق. قاراپايىم حالىقتى قاناۋ بۇل”, – دەدى تۇرعىن تالاپ بورانوۆ.

سونداي-اق, تۇرعىنداردىڭ سوزىنشە, كولىك وتسە, اينالا شاڭ بولىپ, جاڭبىر جاۋسا, باتپاققا باتاتىن جولمەن ءجۇرۋ قيىن ەكەن. ءتىپتى, جەدەل جاردەم مەن ءورت ءسوندىرۋ كولىگى كىرە المايدى ەكەن.

“كوشەمىزدىڭ جاعدايى وتە قيىن. سەبەبى, ومىردە ءتۇرلى جاعداي بولادى قىستا ادام اۋىرسا جەدەل جاردەمدى شاقىرۋ قيىن. ءورت بولاتىن جاعدايدا كىرە المايدى. ءجۇرىپ بولمايدى. جالعىز ءبىز وتىرمىز وسىلاي. ءبىز نە سوندا توقالدان تۋعانبىز با, سوندا?!”, – دەدى تاعى ءبىر تۇرعىن ءالمۇرات قاماش.

شەنەۋنىكتەر كوشەسىنە اسفالت توسەلگەن قىزمەتكەر اكىمدىكتە ءبولىم باسشىسىنىڭ ورىنباسارى بولىپ جۇمىس ىستەيتىنىن راستادى. بىراق بارلىق جۇمىستىڭ جوسپار بويىنشا جۇزەگە اسىپ جاتقانىن جەتكىزدى.

“جالپى سامال ىقشام اۋدانىندا 21,22,23,24,25 كوشەلەردە جول جوق قازىرگى تاڭدا. بىراق, قالا اكىمدىگى تاراپىنان بۇل كوشەلەرگە جوبالاۋ-قۇجاتتاۋ سمەتاسى جاساقتالىپ ءبىتتى. تولىقتاي. قازىرگى تاڭدا مەملەكەتتىك-ساراپتاماعا جۇكتەلدى. جوسپار بويىنشا ماۋسىم ايىنىڭ سوڭىنا قاراي قورىتىندىسىن الامىز! بيۋدجەتتەن قاراجات سۇراتامىز!”, – دەدى اتىراۋ قالالىق جولاۋشىلار كولىگى جانە اۆتوموبيل جولدارى ءبولىمىنىڭ باس مامانى قۋانىشبەك قابدىعالي.

اكىمدىكتەگىلەر جىل سوڭىنا دەيىن سامال ىقشاماۋدانىنداعى بەس كوشەگە جول سالىپ بەرەتىنىن ايتتى.