«Asfalt sheneýnik turatyn kóshede ǵana bar»: Atyraýda turǵyndar joldyń joqtyǵyna narazy

Atyraý qalasynda turǵyndar sheneýnikti ózi turatyn kóshege tep-tegis asfalt tósep, qalǵan kóshelerge kóńil bólmeı otyrǵanyna shaǵymdanýda, dep habarlaıdy Qandastar.kz aqparat portaly 31-arnanyń “Informbıýro”jańalyqtar baǵdarlamasyna silteme jasap. 

Turǵyndardyń aıtýynsha, bir yqshamaýdanda eki túrli kórinis. Bir jaǵy shuryq-tesik bolsa, endi birinde túp-túzý asfalt.

“Sizderge jol joq dep qaǵazyn jaýyp tastady. Artynsha, bir demalys ótpeı ózi 24-shi kóshede turady eken, shaýyp júr. Jol salýǵa jantalasyp júr, óziniń kóshesine. Onda bárimiz solaı ákimdikke jumys jasaıyq. Qarapaıym halyqty qanaý bul”, – dedi turǵyn Talap Boranov.

Sondaı-aq, turǵyndardyń sózinshe, kólik ótse, aınala shań bolyp, jańbyr jaýsa, batpaqqa batatyn jolmen júrý qıyn eken. Tipti, jedel járdem men órt sóndirý kóligi kire almaıdy eken.

“Kóshemizdiń jaǵdaıy óte qıyn. Sebebi, ómirde túrli jaǵdaı bolady qysta adam aýyrsa jedel járdemdi shaqyrý qıyn. О́rt bolatyn jaǵdaıda kire almaıdy. Júrip bolmaıdy. Jalǵyz biz otyrmyz osylaı. Biz ne sonda toqaldan týǵanbyz ba, sonda?!”, – dedi taǵy bir turǵyn Álmurat Qamash.

Sheneýnikter kóshesine asfalt tóselgen qyzmetker ákimdikte bólim basshysynyń orynbasary bolyp jumys isteıtinin rastady. Biraq barlyq jumystyń jospar boıynsha júzege asyp jatqanyn jetkizdi.

“Jalpy Samal yqsham aýdanynda 21,22,23,24,25 kóshelerde jol joq qazirgi tańda. Biraq, qala ákimdigi tarapynan bul kóshelerge jobalaý-qujattaý smetasy jasaqtalyp bitti. Tolyqtaı. Qazirgi tańda memlekettik-saraptamaǵa júkteldi. Jospar boıynsha maýsym aıynyń sońyna qaraı qorytyndysyn alamyz! Bıýdjetten qarajat suratamyz!”, – dedi Atyraý qalalyq jolaýshylar kóligi jáne avtomobıl joldary bóliminiń bas mamany Qýanyshbek Qabdyǵalı.

Ákimdiktegiler jyl sońyna deıin Samal yqshamaýdanyndaǵy bes kóshege jol salyp beretinin aıtty.