اسحات سادىربايدىڭ بۇرىنعى ايەلى كورگەن قورلىعىن جايىپ سالدى

فوتو:كوللاج: Stan.kz

بەلگىلى جۋرناليست اسحات سادىربايدىڭ بۇرىنعى ايەلى ايعانىم بولاتقىزى وتباسىندا بولعان ۇرىس-كەرىستى جايىپ سالدى, دەپ حابارلايدى qandastar.kz اقپارات پورتالى kyn.kz-كە سىلتەمە جاساپ.

سوزىنشە ۇلدارى دۇنيەگە كەلگەننەن باستاپ قارىم-قاتىناستارى ناشارلاپ, ۇرىس-كەرىس باستالعان.

“2015 جىلى “ۆكونتاكتە” الەۋمەتتىك جەلىسى ارقىلى تانىستىق. ول كەزدە 22 جاستا بولدىم. بۇرىنعى نەكەسىندەگى اجىراسۋ سەبەبىن دە بىلمەدىم. ءوزى فوتولارىما ءلۇپىل باسىپ, جازا باستادى. جۋرناليست بولعاسىن ءتىلى دە مايداي جاعىپ, بىردەن باۋراپ الدى. ارامىز التى جاس بولعاسىن, اقىل ايتىپ, باعىت-باعدار بەرىپ وتىردى. مەن ول كەزدە تويلارعا شىعىپ, بيلەيتىن ەدىم. ەكەۋمىز دە شىعارماشىلىقتىڭ ادامى بولعاسىن اڭگىمەمىز جاراستى. ءبىر كۇنى كەزدەسكەندە ماعان وتباسىن قۇرۋ جايلى اڭگىمە ايتتى. سودان مەن ۇيدەگىلەرگە ايتتىم. ولار بىردەن قارسى بولدى. ويتكەنى مەنى كىشكەنتاي كوردى جانە ءۇيدىڭ كەنجەسى بولعانىم ءۇشىن ۇزاتۋعا دايىن بولمادى. 31 ارنادا جۇمىس ىستەيتىن جاراس نيازبەكوۆ دەگەن جۋرناليست تۋىسقان اعامىز بولىپ كەلەدى. سول كىسى دە اسحاتتى تانيتىن بولعاسىن تۇرمىسقا شىعۋىما كەلىسىم بەرمەدى. مەنىڭ وتباسىم ول كىسىنىڭ اجىراسقانىن, تەلەجۋرناليست ەكەنىن بىلەتىن. الايدا ءبىز ەشقانداي قارسىلىققا قاراماي شاڭىراق قۇردىق. الماتىدا انشىلەردىڭ قاتىسۋىمەن ۇيلەنۋ تويىمىز بولدى. مەنىڭ باقىتتان باسىم اينالىپ, وتە كەرەمەت كۇي كەشىپ ءجۇردىم”, – دەپ باستادى اڭگىمەسىن ايعانىم.

ءجۋرناليستىڭ ەكس-جۇبايىنىڭ سوزىنشە, بالالى بولعاننان كەيىن ارالارى سۋىپ كەتكەن.

“بوساعا اتتاعاننان كەيىن جۇكتى بولدىم. ايى-كۇنىم جەتىپ وتىرعاندا اسحات جول اپاتىنا ءتۇستى. ول كەزدە ءبىز پاتەر جالداپ تۇراتىن ەدىك. قىرعىزستانعا كەتكەن ەدى, جولدا اپاتقا ۇشىراعان. ماعان ونى ايتپاعان. باسىنان قاتتى سوققى الىپتى. مەن بىردەن ەستىگەندە قاتتى قورقىپ كەتتىم. سول قورىققانىمنان پەرزەنتحاناعا كەتتىم. وتە اۋىر جاعدايدا بوساندىم. ۇيگە كەلگەننەن كەيىن مەن بالا كۇتىمىن جاسادىم. ەنەم مەن اپكەم اسحاتتى كۇتتى. بالا بولعاسىن جىلايتىن سول كەزدە اكەسى اشۋلانىپ كەتەتىن. شۋدى كوتەرە المادى. مەنىڭ انام “سىزدەرگە قيىن بولىپ جاتىر. مەن ايعانىمدى قاراپ, بالانى ءوسىرىپ بەرەيىن” دەدى. سول كەزدە بۇل جاق قارسى بولدى. سودان ءبىزدى اناسى شىمكەنت جاقتاعى اۋىلىنا الىپ كەتتى. جالپى, ول كىسى اناسىنىڭ ايتقانىمەن عانا جۇرەتىن. “مەنىڭ ايەلىم, مەنىڭ وتباسىم, ءوزىم شەشەمىن” دەگەن سوزدەردى ايتپايتىن”, – دەدى كەلىنشەك.

سونداي-اق ايعانىم ەكس-كۇيەۋىنىڭ العاش قول كوتەرگەن ءساتىن دە ۇمىتپاعانىن ايتتى.

“جول اپاتىنان كەيىن بالداقپەن ءجۇردى. سول كەزدە اناسى دا ۇيدە بولاتىن ەدى. ۇلىمىز زەيىن كىشكەنتاي. ساعات سايىن ەمىزۋ كەرەك. سونداي ءساتتىڭ بىرىندە بالانى ەمىزىپ وتىرعاندا ەنەم بارىپ, “بالانى بەرمەي جاتىر” دەدى. سول ۋاقىتتا اسحات مەنى بالداقپەن ۇرعان. “بالانى قىزعانىپ, مەنىڭ شەشەمە ۇستاتپاي” دەپ كىنالى ەتتى. ول كەزدە قاتتى كۇيزەلىستە جۇرگەن ەدىم. كەيدە اسحاتقا “مەنى قورعاشى, مەنىڭ ءسوزىمدى سويلەشى” دەيتىنمىن. ول تۇسىنبەيتىن. “كانى, جاۋ شاۋىپ جاتىر ما?!” دەيتىن. كەيىن ءبىز استاناعا كوشىپ كەتتىك. سول كەزدە قاتتى سۋىقتا وتىرىپ, اناما حابارلاستىم: “استانانىڭ سۋىعىنان اسحاتتىڭ سۋىعى جامان” دەدىم. سول ءسوز ءالى ەسىمدە. ەر-ازامات رەتىندە قولداۋ, دەمەۋ بولمادى. ءبىر ماسەلە بولسا, شىمكەنتتەن اناسى كەلىپ الاتىن. جۇكتەرىن جيناپ دايىن وتىراتىن سياقتى. ۇلكەن كىسى بولعاسىن ايتا المايمىن. بىراق ەشتەڭە شەشىلمەيتىن. ءتىپتى, ۇستەل باسىندا جاقسى پىكىر ايتسا, ەركىندەپ قالاتىن ەدىم. ءار نارسەگە پىكىر ايتىپ, سىناپ وتىراتىن. ول وتباسى تەك قولدىڭ تاماعىن عانا جەيتىن. قولىمنان وقتاۋ تۇسپەيتىن. بىراق كەرەمەت اسپاز بولماسام دا, تاماق ىستەۋدى ۇيرەنىپ الدىم. “مەن نە نارسەنى دۇرىس ىستەمەي جاتىرمىن, ۇلگىلى تاتۋ وتباسى قانداي بولۋ كەرەك” دەپ باسىم قاتاتىن. ونىڭ ۇيىندە قىزمەتشى سياقتى ءجۇردىم. “مىنا جەر كىر بولىپ تۇر, انا جەر دۇرىس جۋىلماعان” دەيتىن. مەن ءۇشىن ودان جاقسى ءسوز ەستۋ مۇڭعا اينالدى. ءتىپتى “بۇگىن بالانى الىپ شىق, قىدىرتايىق” دەسە, قاتتى قۋاناتىن ەدىم”, – دەدى ايعانىم بولاتقىزى.

ودان كەيىن جۋرناليست كۇيەۋىنىڭ ۇرىپ-سوعۋى جيىلەي بەرگەن. ءتىپتى دەنەسىنە زاقىم كەلتىرىپ, جاراقات سالعان.

“2017-2018 جىلدارى ماعان “سەن جىندىسىڭ سەنى جىندىحاناعا جاتقىزۋ كەرەك” دەپ قۇجات الىپ بەرمەك بولدى. ۇرىس باستالايىن دەپ وتىرعاندا دالاعا شىعىپ كەتەتىن ەدىم. سونداي ءبىر قاشىپ بارا جاتقانىمدا كوزىمنەن ۇرعان. اناسى دا توقتاتپاق بولدى. سول كەزدە كوزىم اعىم كەتكەن ەكەن دەپ ويلادىم. ودان كەيىن تاعى ءبىر ۇرىستا ەسىكتىڭ ىلگىشىنە قولىمدى كەسىپ الامىن. ول تامىردى بىرگە ءتىلىپ جىبەرگەن. بولمەنىڭ ءبارى قان بولدى. جەدەل جاردەم شاقىرىپ, تىگىپ بەردى. سودان كەيىن ماعان جالا جابا باستادى. “مىنانىڭ جۇيكەسى توزعان. دۇنيەنىڭ ءبارىن بۇلدىرەدى” دەپ ءوزىمدى كىنالى ەتتى. جالپى, قازىر تۇسىنگەنىم, ول سونداي ۇرىس باستاسا اجىراسۋ تۋرالى قۇجاتتى ماعان ايتپاي دايىنداپ جۇرگەن. ءبىر كۇنى ۇيگە ەكى كىسى كەلىپ, بولمەگە كامەرا ورناتىپ كەتتى. ونى مەن بىلمەيمىن. ءوزى دە ء“ورت قاۋىپسىزدىگىنە ارنالعان قۇرىلعى” دەدى. كامەرا ورناتۋشىلار دا سولاي ايتتى. كەيىن بارىپ ونىڭ كامەرا ەكەنىن جانە ول ۇيالى تەلەفونىنا ورناتىلعانىن ءبىلدىم. ەگەر مەن بالانى ۇرىپ قويسام, سوتتا كورسەتەمىن دەگەن وي بولعان. مەن شىندىقتى بىلگەننەن كەيىن, قاتتى رەنجىدىم. ونىڭ ءتىلى اششى بولاتىن. اۋىر سوزدەر ايتسا, جىلاپ قالاتىنمىن”, – دەدى ايعانىم.