«اشىق ەمەس, كۇماندى ىرىكتەۋ»: مەرۋەرت تۇسىپباەۆا بايان الاگوزوۆاعا تاعى دا شۇيلىكتى

فوتو: ابىلقاسىم ەسەنتاەۆ/Azattyq Ruhy

قازاقستاننىڭ ەڭبەك سىڭىرگەن قايراتكەرى, ءانشى ءارى اكتريسا مەرۋەرت تۇسىپباەۆا پروديۋسەر بايان الاگوزوۆاعا قاتىستى سىنىن توقتاتار ەمەس. ول پروديۋسەر تۇسىرگەن «قوزى كورپەش – بايان سۇلۋ» تەلەحيكاياسىنىڭ كاستينگىنە كۇمان كەلتىرىپ وتىر, – دەپ حابارلايدى  qandastar.kz   Aikyn.kz سايتىنا سىلتەمە جاساپ.

تۇسىپباەۆانىڭ ايتۋىنشا, جوبا حالىق قارجىسىنا – ۇلتتىق ارنا بيۋدجەتى ارقىلى تۇسىرىلگەن. الايدا باستى رولگە سول كەزدەگى اكىمنىڭ قىزى الىنعان.

«بۇل سەريال بيۋدجەت قارجىسىنا ءتۇسىرىلدى. ال باستى كەيىپكەردى اكىمنىڭ قىزى سومدادى. كاستينگتىڭ قالاي وتكەنىن ەشكىم بىلمەيدى. بۇل – اشىق ەمەس, كۇماندى ىرىكتەۋ», – دەدى ول.

ءانشىنىڭ مالىمدەۋىنشە, وسى پىكىرىنەن كەيىن بايان الاگوزوۆانىڭ جاقتاستارى تاراپىنان قىسىم كورە باستاعان. ونىڭ ىشىندە الاگوزوۆانىڭ ءوزى مەن اپكەسى باعىم مۇسىرەپوۆا بار.

«مەن ءوز پىكىرىمدى عانا ايتتىم. ال ولار بىرىگىپ, جەكە باسىما ءتيىسىپ, بالاعاتتادى. «سەن ەشكىم ەمەسسىڭ», «ءنولسىڭ», «ونەرسىزسىڭ» دەدى. ءبىز ءبىر وقۋ ورنىندا وقىدىق, مەن مۋزىكالىق-دراما بولىمىندە وقىدىم, ول كەيىنىرەك ءتۇستى. مەن ءبىلىمسىز ەمەس اداممىن. قاجەت بولسا, قولىمداعى دالەلدەرمەن كەز كەلگەننىڭ بەتىن اشۋعا دايىنمىن», – دەيدى تۇسىپباەۆا.

ول بۇل جاعدايدان كەيىن وزىنە قارسى قارالاۋ ناۋقانى باستالعانىن العا تارتىپ, الەۋمەتتىك جەلىلەردە جەكە باسىنا شابۋىل جيىلەگەنىن ايتتى.