اسقار جۇمادىلداەۆ: نازارباەۆتىڭ تۇسىندا ەسىموۆكە دەيىن «ەڭبەك ەرى» اتاندى

فوتو: اشىق دەرەككوز

اسقار جۇمادىلداەۆ: نازارباەۆتىڭ تۇسىندا ەسىموۆكە دەيىن «ەڭبەك ەرى» اتاندى, دەپ جازدى qandastar.kz.

قازاقتىلدى ورتاعا سىيلى, «ابستراكتىلى تاقىرىپتاردان» اۋلاق جۇرەتىن اكادەميك اسقار جۇمادىلداەۆتىڭ ايتۋىنشا نازارباەۆتىڭ عالىمدارعا بۇيرەگى بۇرا بەرمەيتىن. DALA INSIDE تۇنەۋكۇنى توقاەۆتىڭ قولىنان ماراپات العان عالىمنىڭ Assyltas ارناسىنا بەرگەن سۇحباتىن شولىپ شىققان ەدى. رەسپۋبليكا كۇنى قارساڭىندا پرەزيدەنت توقاەۆ اسەكەڭدى «قازاقستاننىڭ ەڭبەك ەرى» اتاعىمەن ماراپاتتاعان. عالىمنىڭ ايتۋىنشا, بۇل ونىڭ تۇڭعىش مەملەكەتتىك وردەنى.

«مەندە مەدال بولعانىمەن, مەملەكەتتىك وردەندەر جوق ەكەن. اكادەميا مەنى «قۇرمەت» وردەنىنە ۇسىنىپتى. قومسىنباعانىم ەمەس, «مۇنى جاس بالالار دا الىپ جاتىر عوي, ولارمەن جاعالاسىپ جۇرگەنىم جاراماس» دەپ ەدىم, سويتسەم زاڭ سونداي ەكەن. «قۇرمەتتى» كەۋدەڭە تاققاسىن, تاعى بەس جىل كۇتەسىڭ. بىراق كەيىن پرەزيدەنتتىڭ پارمەنىمەن بۇل شەشىم وزگەرتىلىپتى. اقىر سوڭىندا, «قازاقستاننىڭ ەڭبەك ەرى» اتاعىن الدىم», – دەيدى اسەكەڭ. عالىم سول كۇنگى استانا كوشەسىندەگى كەپتەلىستىڭ كەسىرىنەن اقورداعا اۆتوبۋسپەن بارۋعا ءماجبۇر بولعان. «تاكسي شاقىرىپ ەدىم كەلمەدى. امال جوق, اۆتوبۋسقا ءمىندىم. ءبىر ستۋدەنتتەر تانىپ قالىپ, سالەمدەستى. ءبىر ساعاتقا جۋىق ءجۇرىپ, اقورداعا ارەڭ جەتتىم. سول ارالىقتا قۇتتىقتاپ قوڭىراۋ شالعاندار كوپ بولدى, بىراق نە ءۇشىن قۇتتىقتاپ جاتقانىن ءوزىم بىلمەيمىن», – دەپ ەسكە الدى ول. اكادەميكتىڭ ايتۋىنشا ەكس-پرەزيدەنتتىڭ عالىمدارعا بۇيرەگى بۇرا بەرمەيتىن. نازارباەۆتىڭ زامانىندا عىلىم-ءبىلىم قۋعان قاۋىمعا مۇنداي اتاق سيرەك بەرىلەتىن.

«مەنىڭ وردەنىمنىڭ ارعى بەتىندە 52 سانى تاڭبالانىپ تۇر. وسى ساتكە دەيىن بۇل توسبەلگى 52 ادامنىڭ كەۋدەسىنە تاعىلىپتى. سونىڭ تەڭ جارتىسىن نازارباەۆ تابىستاعان ەكەن. بىراق ەسىموۆكە, ءىرى حولدينگ باسشىلارىنا, ۇستازدارعا, دارىگەرلەرگە, اقىن-جازۋشىلارعا بەرگەن ەكەن. عالىمدارعا بۇيىرماعان. مۇمكىن, وسى ساناتتاعى العاشقى لاۋرەات مەن شىعارمىن», — دەيدى اكادەميك. بۇعان دەيىن سۇحباتىنىڭ بىرىندە اسقار جۇمادىلداەۆ مىرزا «قازاققا اقىن ەمەس, تەحنوكرات كەرەك» دەپ, ەلىمىزدىڭ تەحنولوگيالىق دامۋعا مۇقتاج ەكەنىن اتاپ وتكەن ەدى. عالىمنىڭ ەكس-پرەزيدەنتتى اشىق سىناعان كەزىن ەسكە تۇسىرە الماي تۇرمىز. دەگەنمەن, نازارباەۆ بيلىگىنىڭ سوڭىندا «شيكىزات ەمەس, اقىل ساتاتىن زامان تۋدى» دەگەن جۇمادىلداەۆ ۇكىمەتتىڭ «اتا-بابامىزدىڭ بارلىق بايلىعىن بىتىرلاتىپ ساتىپ جاتقانىن» سىناعان ەدى.