Jańalyqtar
Asqar Jumadildaev: Nazarbaevtyń tusynda Esimovke deıin «Eńbek eri» atandy
Foto: ashyq derekkóz
Asqar Jumadildaev: Nazarbaevtyń tusynda Esimovke deıin «Eńbek eri» atandy, dep jazdy qandastar.kz.
Qazaqtildi ortaǵa syıly, «abstraktili taqyryptardan» aýlaq júretin akademık Asqar Jumadildaevtyń aıtýynsha Nazarbaevtyń ǵalymdarǵa búıregi bura bermeıtin. DALA INSIDE túneýkúni Toqaevtyń qolynan marapat alǵan ǵalymnyń Assyltas arnasyna bergen suhbatyn sholyp shyqqan edi. Respýblıka kúni qarsańynda prezıdent Toqaev Asekeńdi «Qazaqstannyń Eńbek Eri» ataǵymen marapattaǵan. Ǵalymnyń aıtýynsha, bul onyń tuńǵysh memlekettik ordeni.
Ǵalym eski Qazaqstannyń dáýirlep turǵan shaǵynda da mundaı syı-qurmetke usynylǵanyn jasyrmaıdy, alaıda áldebir sebeppen sanattan syzylyp qala bergen.
«Mende medal bolǵanymen, memlekettik ordender joq eken. Akademııa meni «Qurmet» ordenine usynypty. Qomsynbaǵanym emes, «muny jas balalar da alyp jatyr ǵoı, olarmen jaǵalasyp júrgenim jaramas» dep edim, sóıtsem zań sondaı eken. «Qurmetti» keýdeńe taqqasyn, taǵy bes jyl kútesiń. Biraq keıin Prezıdenttiń pármenimen bul sheshim ózgertilipti. Aqyr sońynda, «Qazaqstannyń Eńbek Eri» ataǵyn aldym», – deıdi Asekeń. Ǵalym sol kúngi Astana kóshesindegi keptelistiń kesirinen Aqordaǵa avtobýspen barýǵa májbúr bolǵan. «Taksı shaqyryp edim kelmedi. Amal joq, avtobýsqa mindim. Bir stýdentter tanyp qalyp, sálemdesti. Bir saǵatqa jýyq júrip, Aqordaǵa áreń jettim. Sol aralyqta quttyqtap qońyraý shalǵandar kóp boldy, biraq ne úshin quttyqtap jatqanyn ózim bilmeımin», – dep eske aldy ol. Akademıktiń aıtýynsha eks-prezıdenttiń ǵalymdarǵa búıregi bura bermeıtin. Nazarbaevtyń zamanynda ǵylym-bilim qýǵan qaýymǵa mundaı ataq sırek beriletin.
Eski Qazaqstannyń kezinde Nazarbaevtyń nemere inisi Ahmetjan Esimovke deıin berilgen «Eńbek eri» ǵalymdardy aınalyp óte bergen.
«Meniń ordenimniń arǵy betinde 52 sany tańbalanyp tur. Osy sátke deıin bul tósbelgi 52 adamnyń keýdesine taǵylypty. Sonyń teń jartysyn Nazarbaev tabystaǵan eken. Biraq Esimovke, iri holdıng basshylaryna, ustazdarǵa, dárigerlerge, aqyn-jazýshylarǵa bergen eken. Ǵalymdarǵa buıyrmaǵan. Múmkin, osy sanattaǵy alǵashqy laýreat men shyǵarmyn», — deıdi akademık. Buǵan deıin suhbatynyń birinde Asqar Jumadildaev myrza «qazaqqa aqyn emes, tehnokrat kerek» dep, elimizdiń tehnologııalyq damýǵa muqtaj ekenin atap ótken edi. Ǵalymnyń eks-prezıdentti ashyq synaǵan kezin eske túsire almaı turmyz. Degenmen, Nazarbaev bıliginiń sońynda «shıkizat emes, aqyl satatyn zaman týdy» degen Jumadildaev Úkimettiń «ata-babamyzdyń barlyq baılyǵyn bytyrlatyp satyp jatqanyn» synaǵan edi.
