جاڭالىقتار
اسكەردە تاعى ءبىر سارباز قايتىس بولدى
اسكەردەگى ولىمدەر تىيىلار ەمەس: تاعى ءبىر جاس سارباز كوز جۇمدى, دەپ حابارلايدى qandastar.kz
قازاقستاندا اسكەر قاتارىندا جۇرگەن 19 جاستاعى دىنمۇحامەد شىناربەكتىڭ قازا تاپقانى تۋرالى اقپارات الەۋمەتتىك جەلىلەردە جاريالاندى. بۇل قايعىلى حاباردى ونىڭ اپكەسى تاراتتى.
دىنمۇحامەد شىناربەك اسكەرگە ەگىزى دانيالمەن بىرگە شاقىرىلعان. كۇزدە دانيال, ال كوكتەمدە دىنمۇحامەد بورىشىن وتەۋگە اتتاندى. جىگىتتەر وتاردا بىرگە قىزمەت ەتۋدى قالاعانىمەن, انت قابىلداعان سوڭ دىنمۇحامەدتى باسقا اسكەري بولىمگە – وتار ماڭىنداعى ماتىبۇلاق اۋىلىنداعى 01098 بولىمگە اۋىستىرىپ, ەگىزىن بولەك جىبەرگەن.
رەسمي دەرەك بويىنشا, جاس سارباز ءدال وسى بولىمدە ءوز-وزىنە قول جۇمساعان. الايدا تۋىستارى بۇل نۇسقاعا سەنبەي وتىر.
29 تامىز كۇنى دىنمۇحامەد نەبارى 19 جاسقا تولعان ەدى. اپكەسىنىڭ ايتۋىنشا, ول ەڭبەكقور, مەيىرىمدى, بولاشاققا ۇلكەن جوسپارلار قۇرعان جىگىت بولعان. قازىر وتباسى قازانىڭ شىنايى سەبەبىن انىقتاۋدى جانە ادىلدىكتىڭ ورناۋىن تالاپ ەتۋدە.
