اسكەرگە شابىتپەن اتتانعان بالالار تابىتپەن ورالماۋى كەرەك – دەپۋتات

ءماجىلىس دەپۋتاتى نارتاي سارسەنعاليەۆ اسكەردەگى الىمجەتتىك ءالى دە ءورشىپ تۇر دەگەن پىكىردە, دەپ حابارلايدى Skifnews.kz اقپارات پورتالى.

«ەلىن, مەملەكەتىن, وتانىن قورعايمىن دەپ اسكەرگە شابىتپەن اتتانعان بالالار تابىتپەن ورالماۋى كەرەك. ءوزىمىز كورىپ جاتىرمىز, ساپ-ساۋ كەتكەن بالالار اسكەرگە بارادى, 5-10 مىڭ تەڭگەدەن اركىمنەن اقشا سۇرايدى, ەڭ سوڭىندا مۇگەدەك بولىپ توسەككە تانىلىپ كەلىپ جاتىر. وسىدان كەيىن «اسكەرگە بالاڭدى جىبەر, وتان قورعاۋى كەرەك» دەپ ءبىز قاي اتا-اناعا ايتامىز,  كىمدى مىندەتتەيمىز, كىمدى ۇگىتتەيمىز – سۇراق وسىندا. سوندىقتان دا مەن اسكەردەگى الىمجەتتىك ءالى دە ءورشىپ تۇر دەگەن پىكىردەمىن. مۇنى جوققا شىعارا المايمىز», – دەدى حالىق قالاۋلىسى ۇكىمەت ءۇيىنىڭ كۋلۋارىندا.

سوزىنشە, اسكەردەگى الىمجەتتىكتەن زارداپ شەككەن بالالارعا قاتىستى تەرگەۋدى دە مۇقيات قاراۋ كەرەك.

«جۋىردا ءبىزدىڭ باۋىرىمىز (رەد. – سارباز ەربايان مۇحتار) زارداپ شەكتى. الماتىدا قارالدى,  قازىر ۇيىنە ورالدى. حالقىمىز 200 ملن تەڭگەدەن استام قارجى جيناپ بەردى. بىراق دارداي بالانىڭ اسكەردەگى اجەتحانانىڭ ىشىندە قۇلاپ, باسىن جارىپ الدى دەگەنى اقىلعا قونا ما, جوق پا? مەن بۇل نۇسقاعا مۇلدەم سەنبەيمىن. سوندىقتان دا اسكەردەگى الىمجەتتىكتى توقتاتۋ كەرەك, رەفورما قاجەت. جۋرناليستىك مانسابىمدا ءتيىستى مينيسترلىكپەن سۇحباتتاسقان كەزدە ولار بارلىق جەرگە بەينەباقىلاۋ كامەرالارىن قويامىز دەدى, بارلىق جەرگە قويىلسا, ول بەينەكامەرا مەن ناتيجەسى قايدا? (…) اسكەردەن بولەك, سول بولعان جاعدايدى تەكسەرەتىن, تەرگەيتىن ورگانداردىڭ اراسىندا قانداي دا ءبىر سىبايلاستىق بار ما دەگەن مەندە كۇمان تۋادى. مۇنى جوققا شىعارا المايمىن. بۇل ماسەلەمەن ءجىتى اينالىسۋىمىز كەرەك», – دەدى سارسەنعاليەۆ.

ول اسكەرگە تولىققاندى رەفورما جاساۋ قاجەت دەگەن پىكىردە.

ءوز كەزەگىندە دەنساۋلىق ساقتاۋ ءمينيسترى اقمارال ءالنازاروۆا اسكەردەن مۇگەدەك بوپ ورالعان ەربايان مۇحتارعا قاتىستى پىكىر ءبىلدىردى

«مەديتسينالىق كومەكتىڭ اسكەري ۆەدومستۆولىق قىزمەتتىڭ ماماندارىمەن كورسەتىلەتىنىن ايتا كەتۋ كەرەك. بىراق ءبىز دەنساۋلىق ساقتاۋ مينيسترلىگى ءوز تاراپىنان بۇل ماسەلەنى ۇستاپ وتىر. ءتيىستى كونسيليۋم جۇرگىزۋگە, باسقا دا كومەك كورسەتۋگە تولىعىمەنەن دايىنبىز. ءبىز بۇل جۇمىستى اتقارىپ جاتىرمىز. نەگىزى دسم تاراپىنان بۇل ماسەلە باقىلاۋدا»,  – دەدى ول.

سوزىنشە, اسكەر قاتارىندا بورىشىن وتەپ جۇرگەن جاس ساربازداردىڭ دەنساۋلىعىنا ءتيىستى مەديتسينالىق كوميسسيا قارايدى.