جاڭالىقتار
اسكەري ءبولىم اۋماعىندا ءۇش ادام مەرت بولدى
ارىس قالاسىنداعى اسكەري ءبولىم اۋماعىندا ءۇش ادام قازا تاپتى, دەپ حابارلايدى qandastar.kz.
قورعانىس مينيسترلىگىنىڭ مالىمەتىنشە, ولار كارىز جۇيەسىنە قىزمەت كورسەتۋ مەن تازالاۋ جۇمىستارىن جۇرگىزۋ كەزىندە كارىز گازىمەن ۋلانعان.
وقيعا 5 شىلدەدە بولعان. قايتىس بولعانداردىڭ ەكەۋى – جۇمىسشى جانە بىرەۋى –كەلىسىمشارت بويىنشا اسكەري قىزمەتشى.
«وقيعا جۇمىس بارىسىندا ابايسىزدا قۇدىققا قۇلاپ كەتكەن شىمكەنت اۋداندىق پايدالانۋ ءبولىمىنىڭ جۇمىسشىسىن قۇتقارۋ كەزىندە بولعان. وعان كومەككە بارعان تاعى ەكى جۇمىسشى مەن كەلىسىمشارت بويىنشا ەكى اسكەري قىزمەتشى دە جاعدايدىڭ ناشارلاۋىنا بايلانىستى جوعارى جاققا كوتەرىلىپ شىعا الماعان. سالدارىنان ءۇش ادام سول جەردە قازا تاپتى», — دەپ جازدى ۆەدومستۆو.
تاعى ءبىر جۇمىسشى مەن اسكەري قىزەتشى ارىس قالاسىنىڭ اۋرۋحاناسىنا جەتكىزىلدى. قازىرگى تاڭدا ولاردىڭ جاعدايى اۋىر.
قورعانىس مينيسترلىگىنىڭ باسشىلىعى مەن قارۋلى كۇشتەردىڭ جەكە قۇرامى قازا تاپقانداردىڭ وتباسىلارىنا بارلىق قاجەتتى كومەك كورسەتەدى, دەيدى مينيسترلىك.
قازىرگى ۋاقىتتا قىلمىستىق كودەكستىڭ 156-بابى 4-بولىگى «ەڭبەكتى قورعاۋ ەرەجەلەرىن بۇزۋ» بويىنشا سوتقا دەيىنگى تەرگەۋ ءجۇرىپ جاتىر.
