اسكەري قىزمەتكەر بەيتانىس ايەلدى ءولتىرىپ, قىزدارىن ۇرلاماق بولعان

كۋرسك سوتى بەيتانىس ايەلدى ءولتىرىپ, ونىڭ قىزدارىن ۇرلاماق بولعان رەسەيلىك اسكەري قىزمەتكەردى قاماۋعا الدى. بۇعان دەيىن ول زورلاۋ بابىمەن سوتتالعان, دەپ حابارلايدى qandastar.kz سايتى Alash.kz ۇلتتىق پورتالىنا سىلتەمە جاساپ.

كۋرسك گارنيزونىنىڭ اسكەري سوتى دميتري ستەنكيندى قاماۋعا الدى — ول «پەپەل كۋرسك» باسىلىمىنىڭ دەرەگىنشە, شەكاراعا جاقىن ورنالاسقان گيري اۋىلىندا تۇراتىن ايەلدى ءولتىردى دەگەن كۇدىككە ىلىنگەن.

30 ساۋىرگە قاراعان ءتۇنى اسكەري قىزمەتكەر جەكە ۇيگە باسىپ كىرىپ, وق جاۋدىرىپ, 41 جاستاعى ولەسيا لارينانى ولتىرگەن. ونىڭ كۇيەۋى يگور اۋىر جاراقات العان. بولجام بويىنشا, شابۋىل جاساعان ادام ەرلى-زايىپتىنىڭ 10 جانە 6 جاستاعى ەكى قىزىن ۇرلاپ اكەتۋگە دە تىرىسقان.

«پەپەل» باسىلىمىنىڭ مالىمەتىنشە, دميتري ستەنكين — استراحان قالاسىنان شىققان بۇرىنعى سوتتالعان ادام. ول كەمىندە ءۇش رەت سوتتالعان, ونىڭ ىشىندە كامەلەتكە تولماعان قىزدى زورلاعانى ءۇشىن دە. وتكەن جىلى ول قايتادان كولونياعا ءتۇسىپ, سول جەردە رەسەي قورعانىس مينيسترلىگىمەن كەلىسىمشارتقا وتىرعان.