Áskerı qyzmetker beıtanys áıeldi óltirip, qyzdaryn urlamaq bolǵan

Kýrsk soty beıtanys áıeldi óltirip, onyń qyzdaryn urlamaq bolǵan reseılik áskerı qyzmetkerdi qamaýǵa aldy. Buǵan deıin ol zorlaý babymen sottalǵan, dep habarlaıdy qandastar.kz saıty Alash.kz ulttyq portalyna silteme jasap.

Kýrsk garnızonynyń áskerı soty Dmıtrıı Stenkındi qamaýǵa aldy — ol «Pepel Kýrsk» basylymynyń dereginshe, shekaraǵa jaqyn ornalasqan Gırı aýylynda turatyn áıeldi óltirdi degen kúdikke ilingen.

30 sáýirge qaraǵan túni áskerı qyzmetker jeke úıge basyp kirip, oq jaýdyryp, 41 jastaǵy Olesıa Larınany óltirgen. Onyń kúıeýi Igor aýyr jaraqat alǵan. Boljam boıynsha, shabýyl jasaǵan adam erli-zaıyptynyń 10 jáne 6 jastaǵy eki qyzyn urlap áketýge de tyrysqan.

«Pepel» basylymynyń málimetinshe, Dmıtrıı Stenkın — Astrahan qalasynan shyqqan burynǵy sottalǵan adam. Ol keminde úsh ret sottalǵan, onyń ishinde kámeletke tolmaǵan qyzdy zorlaǵany úshin de. О́tken jyly ol qaıtadan kolonııaǵa túsip, sol jerde Reseı Qorǵanys mınıstrligimen kelisimshartqa otyrǵan.