«اسكەريلەر ءبىر-بىرىمەن جارىسقان»: اقتوبە وبلىسىندا اسكەري قىزمەتكەر 17 جاستاعى قىزدى قاعىپ ءولتىردى

فوتو: ۆيدەودان سكرين

سامارا – تاشكەنت اۆتوجولىندا قاتتى جىلدامدىقپەن كەلە جاتقان اسكەري قىزمەتكەر جاياۋ جۇرگىنشىلەر جولىنان ءوتىپ بارا جاتقان 17 جاستاعى قىزدى قاعىپ كەتتى. اۋىر جاراقات سالدارىنان كامەلەت جاسقا تولماعان قىز اۋرۋحانادا كوز جۇمدى. بۇل تۋرالى Stan.kz اقپارات اگەنتتىگى ZTB News پورتالىنا سىلتەمە جاساپ حابارلايدى.

جول اپاتى 1 تامىز كۇنى بولعان. مارقۇمنىڭ اپكەسى الەۋمەتتىك جەلىدەگى پاراقشاسىندا كولىك جۇرگىزۋشىسىنىڭ جازالانۋىن تالاپ ەتىپ, جازبا جاريالادى. وپات بولعان قىزدىڭ اپكەسىنىڭ ايتۋىنشا, قىز جاياۋ جۇرگىنشىلەر جولىنان وتپەك بولعان. ونى بايقاعان تراكتور توقتاپ, ەرەجە بويىنشا وعان جول بەرگەن. الايدا قىز تراكتوردىڭ ارتىندا كەلە جاتقان كولىكتى كورمەگەن. جۇرگىزۋشى تراكتوردىڭ توقتاپ تۇرعانىنا ءمان بەرمەستەن قاتتى جىلدامدىقپەن جاياۋ جۇرگىنشىنى قاعىپ وتكەن كورىنەدى.

“اۋرۋحاناعا جەتكەندە ول ەس-ءتۇسسىز ەدى. ول وزدىگىمەن دەم الا الماعاندىقتان, ونى بىردەن جانساقتاۋ بولىمىنە جاتقىزدى. بىراق دارىگەرلەر ونىڭ العان جاراقاتتارى اۋىر ەكەنىن, جاعدايى تىم مۇشكىل ەكەنىن ايتتى. دارىگەرلەر 3 ساعات بويى اقبوتانى امان الىپ قالۋعا تىرىستى. ءبىز ودان ايىرىلىپ قالامىز دەپ ويلامادىق”, – دەپ جازدى جەلى قولدانۋشىسى.

مارقۇمنىڭ اپكەسىنىڭ ايتۋىنشا, ءتىپتى اۋرۋحانادا بولعان كەزدە دە بىردە ءبىر پوليتسيا قىزمەتكەرى بارىپ حاتتاما تولتىرۋ تۋرالى ايتپاعان. ەشكىم ولاردان جاۋاپ الماعان.

العاشىندا ول ءسىڭلىسىن قاعىپ كەتكەن اسكەري قىزمەتكەردىڭ جازالانباعانىن ايتىپ, شاعىمدانعان ەدى. مارقۇمنىڭ جاقىندارى جانتۇرشىگەرلىك جول اپاتى تۋرالى الەۋمەتتىك جەلىگە سالىپ, ماسەلەنى كوتەرگەن.

“3 تامىزعا دەيىن بىزگە ەشكىم حابارلاسپادى.قىلمىستىق ءىس قوزعالعان نە قوزعالماعانىن وزىمىز بارىپ بىلدىك. ءبىزدى ماي-عا جىبەردى, ولارعا قايتا پوليتسياعا بارۋىمىز كەرەگىن ايتتى. ال پوليتسياداعىلار بۇل ىسپەن اسكەري پوليتسيا اينالاستىنىن جەتكىزدى. نە ىستەرىمىزدى بىلمەدىك. ءوزىمىز ادۆوكات جالداپ, كىرىسكەندە قىلمىستىق ءىستىڭ قوزعالماعانىن بىلدىك. زاڭ بۇلاي باياۋ قيمىلدايتىن بولسا, حالىق كومەكتەسەدى دەپ ويلادىق”, – دەلىنگەن جازبادا.

ايماقتىق قوعامدىق پاراقشالاردا قولدانۋشىلار اراسىندا شۋ شىققان سوڭ عانا پوليتسەيلەر بۇل ءىستى تولىق قولعا العان. سەبەبى كۇدىكتى تەك 6 تامىزدا, ياعني قايعىلى وقيعادان كەيىن ءبىر اپتادان سوڭ ۇستالدى.

“تەرگەۋ سوتى كۇدىكتى تەمىر س.ت. سانكتسيامەن قاماۋعا الدى”, – دەدى اقتوبە گارنيزونى اسكەري پوليتسيا باسقارماسى باستىعىنىڭ مىندەتىن اتقارۋشى تالعات احمەتوۆ.

سونداي-اق مارقۇم قىزدىڭ اپكەسى قىلمىستىق ءىس ءجۇرىپ جاتقانىمەن, ونىڭ كۇماندى تۇستارى كوپ ەكەنىن ايتادى.

“اناما نەگە ەكەنى بەلگىسى سۋديا حابارلاستى. بىراق زاڭ بويىنشا بۇلاي بولماۋ كەرەك. سونىمەن قاتار ساراپتاما وقيعا ورنىنان باستاپ قاتە جۇرگىزىلگەن. سودان كەيىن ولار باسقا اۋرۋحانانى جانە قىزدىڭ دەنەسىندە تەك ءبىر جاراقات بولعانىن كورسەتكەن. وندا وتىرىك كوپ, ولار وقيعانىڭ ورنىن جانە كولىكتىڭ ماركاسى مەن ءنومىرىن دە كورسەتپەگەن. كۇدىكتى ءوز كىناسىن مويىنداعان, بىراق ونىڭ ايتقانى شىندىققا جاناسپايدى. ول ءسىڭلىمنىڭ “جوق جەردەن اتىپ شىقتى” دەپ جازعان. وسىلايشا جازاسىن جەڭىلدەتۋگە تىرىسىپ جاتىر. ال ءبىز ادىلدىككە قول جەتكىزگىمىز كەلەدى, ءبىز قاراپايىم حالىقپىز, زاڭ بويىنشا بىزدىكى دۇرىس”, – دەيدى قىزدىڭ اپكەسى.

ول وسىلايشا ءىس سوتتالۋشىنىڭ پايداسىنا شەشىلۋى مۇمكىن دەپ قورقادى.

اراعا ۋاقىت سالىپ قايعىلى وقيعانى ءوز كوزىمەن كورگەن كۋاگەر دە تابىلدى. ونىڭ ايتۋىنشا, كۇدىككە ىلىگەن اسكەري قىزمەتكەر ارىپتەستەرىمەن جارىسقان.

“مەن جولدا تۋىستارىممەن كەلە جاتقاندا الدىمىزدان ەكى كولىك ءوتتى. ءبىرى اق, ەكىنشىسى قارا. ولار جارىسىپ بارا جاتقانداي بولدى. اق كولىك العا قارا وزىپ, جاياۋ جۇرگىنشىلەر جولىنا ءوتىپ كەتتى. سالدارىنان ول قىزدى قاعىپ كەتتى, ونىڭ سومكەسى قولىنان ۇشىپ كەتكەنىن كوردىم. كەيىن الەۋمەتتىك جەلىلەردە ول قىزدىڭ حيدجاب كيگەنى تۋرالى جازبانى كوردىم. بىراق ءبىز ءوتىپ بارا جاتقاندا قىزدىڭ باسىنداعى ورامالى ءتۇسىپ كەتكەن ەكەن. سوندىقتان مەن ونى بىردەن تانىماىدم. تەك سول سومكەنى كورگەندە عانا ەسىمە ءتۇستى. قاتتى سوققىدان كەيىن قىز ۇشىپ ءتۇستى”, – دەيدى كۋاگەر.

سونداي-اق ول جول اپاتىنان كەيىن ەكى كولىكتەن 8-گە جۋىق اسكەري كيىمدەگى ەر ادام شىققان. ولار قىزدىڭ تامىرىن ۇستاپ كورگەنىن ايتقان.