جاڭالىقتار
استانا اكىمى ەڭبەك داۋىن شەشپەي تۇرىپ, 1 ملن ءتۇپ اعاشتى قالاي وتىرعىزباق?
اكىمدىك نە دەيدى?
كۇنى كەشە تاڭدا «استانا-كوگالداندىرۋ قۇرىلىسى» جشس جۇرگىزۋشىلەرى مەن مەحانيزاتورلارى كاسىپورىن اۋلاسىندا جينالىپ, ەڭبەكاقىنى دەرەۋ كوتەرۋ ماسەلەسىن تالاپ ەتتى, دەپ جازدى qandastar.kz
ولاردىڭ ايتۋىنشا, كومپانياداعى جالاقى ءۇش جىل بويى ءوسىپ كورمەگەن, ال تولەم كۇنى كەلگەندە «جابىلىپ قالعان تەحنيكانى سىلتاۋ ەتىپ» كەشىكتىرە بەرەتىن كورىنەدى.
بۇل تۋرالى Ulysmedia پورتالى جازعان. دەرەككوزگە سەنسەك:
«بىزگە, نەگىزگى جۇمىس كۇشى ءبىز بولساق تا, الىنعان تەحنيكانىڭ باعاسى مەن وتىرعىزىلعان كوشەتتەر سانى جايلى ءجيى ەسەپ بەرەدى, بىراق ءوز قالتامىزعا تۇسەر ناقتى تەڭگەنى كوتەرۋگە كەلگەندە ءبارى ءۇنسىز. ال ديرەكتور دورەكى», – دەيدى جۇمىسشىلاردىڭ ءبىرى.
اكىمدىك نە دەيدى?
اكىمدىك بۇل جينالىستى «سانكتسيالانباعان» دەپ اتاپ, رەسمي تۇسىنىكتەمە تاراتتى: 2024 جىلى جۇرگىزۋشىلەر مەن مەحانيزاتورلاردىڭ ورتاشا ايلىعى 690 746 تەڭگە بولعان, ال سىياقى ءبىر جارىم جىلدا 15 رەت بەرىلىپتى.
«قىسقى ماۋسىمداعى توقىراۋدى بولدىرماس ءۇشىن قاراشادان ناۋرىزعا دەيىن جالاقى ۋاقىتىلى تولەندى, ءبىر جىلدان ارتىق ەڭبەك ەتكەندەرگە ءبىر ايلىق كولەمىندە ساۋىقتىرۋ جاردەماقىسى قاراستىرىلعان», — دەلىنگەن جاۋاپتا. الايدا جۇمىسشىلار «ورتاشا» دەگەن كورسەتكىش ناقتى قولعا تيەتىن سومانى بۇركەمەلەيدى دەپ سانايتىن سياقتى. سەبەبى ماۋسىمدىق توقىراۋدا تابىس كۇرت تۇسسە, «ورتاشا» دەگەن ستاتۋستى ەڭسەرەتىندەر – كاسىپورىن باسشىلىعىنداعى ايلىعى جوعارى قىزمەتكەرلەر ەكەنى انىق. شىن مانىندە, جۇمىستىڭ اۋىرلىعى مەن زيانىن بىلمەي, ءوز ويىن ايتقان جۇمىسشىلاردى «جالاقىسى جوعارى ەكەن» دەپ ايىپتاي سويلەۋ جالپى اكىمدىكتەردىڭ ۇيرەنشىكتى تاسىلىنە اينالىپ بارادى. سەبەبى ولاردا حالىقپەن تىعىز ءارى شىنايى بايلانىس جوق. سوندا استانا اكىمدىگى وسى جەردە ءبىرازدان بەرى جۇمىس ىستەيتىن قىزمەتكەرلەر «ءىشى پىسقاننان» ەرەۋىلگە شىقتى دەپ ويلاي ما?.. قىزىق… جارايدى, اكىمدىك كوپ جالاقىنى كورسەتكەندەي بولىپ, جۇرگىزۋشىلەر مەن مەحانيزاتورلاردىڭ ەڭبەكاقىسىن جازىپتى. ال باسقا قىزمەتكەرلەردىڭ جالاقىسى قانداي? بۇل جونىندە اكىمدىك نەگە «قۋانا» ايتپايدى? سەبەبى سول جۇمىسشىلاردىڭ جالاقىسى تومەن ەكەنى راس بولىپ تۇر…
بۇرىن ءىستى بولعان كومپانيا
اكىم جەڭىس قاسىمبەك ءدال وسى كۇنى مەملەكەت باسشىسىنا بيىل استانادا 1 ميلليوننان استام كوشەت وتىرعىزۋ, 180نەن كوپ قوعامدىق كەڭىستىكتى اباتتاندىرۋ جوسپارىن تانىستىرىپ, «جاسىل رەۆوليۋتسيا» تۋرالى جارىسا قۋانا-قۋانا سويلەپ جۇرگەن ەدى. جوبا بيۋدجەتتەن كوپ ميلليارد تەڭگە تالاپ ەتەدى, ال سول جاسىل جەلەكتى وتىرعىزىپ, كۇتىپ-باپتايتىن جۇمىسشىلار وزدەرىن «ارزان قول كۇشى» سەزىنىپ وتىر. مۇنى جەڭىس قاسىمبەك قالانىڭ باسشىسى رەتىندە جاقسى بىلە مە ەكەن? جالپى بۇل اكىم قاراپايىم قىزمەتكەرلەرمەن كەزدەسۋگە بارا قويمايدى. تەك ەليتالىق تۇرعىن ءۇي ورتەنسە عانا شاۋىپ باراتىن اكىمنىڭ جاتاقحانا قرتەنگەن كەزدە تۇرعىندارمەن كەزدەسپەگەنىن بۇعان دەيىن دە جازعان ەدىك.
كوممۋنالدىق كاسىپورىنداعى الەۋمەتتىك ادىلەتسىزدىككە جەمقورلىق داعى دا قوسىلىپ وتىر. 2024 جىلدىڭ ماۋسىمىندا «استانا-كوگالداندىرۋ قۇرىلىسى» جشس بۇرىنعى باس ديرەكتورى 15 ملن تەڭگە پارا سۇرادى دەگەن كۇدىكپەن قاماۋعا الىندى. تەرگەۋ مالىمەتىنە قاراعاندا, ول قۇقىق قورعاۋ ورگاندارىنا قىلمىستىق ءىستى توقتاتۋ ءۇشىن اقشا ۇسىنباق بولعان ءارى وتكەن جىلدارى كوشەت وتىرعىزۋ جۇمىستارىنىڭ باعاسىن قولدان قىمباتتاتتى دەپ ايىپتالدى. بۇل وقيعا كاسىپورىن قارجىسىن باقىلاۋ قالاي السىرەگەنىن كورسەتتى. ال سول كەزدە دە كومپانيا باسشىلىعىنىڭ ۇستىنەن باسقارعان ادام استانا قالاسىنىڭ اكىمى وسى جەڭىس قاسىمبەك ەمەس پە?..
جەڭىس قاسىمبەكتە جاۋاپكەرشىلىك بار ما ءوزى?
ءيا, «استانا-كوگالداندىرۋ قۇرىلىسى» جشس 100 % كوممۋنالدىق مەنشىككە تيەسىلى. دەمەك اكتسيونەرلىك جاۋاپكەرشىلىك – تىكەلەي قالا اكىمى جەڭىس قاسىمبەكتىڭ موينىندا. ەڭبەكاقى حاقىندا تۋىنداعان شيەلەنىس تە, كوررۋپتسيالىق جانجال دا باسقارۋشى قۇرىلىمنىڭ تازا ەمەس ەكەنىن ايعاقتايدى. «بالىق باسىنان ءشىريدى» دەگەن ماتەل وسىندايدا دۇرىس قولدانىلسا كەرەك. قازاقستاندا وي ەركىندىگى قانداي قيىن ماسەلە بولسا, جۇمىسشىنىڭ ءوزى ەرەۋىلگە شىعۋ ءۇشىن كۇردەلى «راسىمدەردەن» ءوتۋى كەرەك ەكەنى ءوز الدىنا بولەك اڭگىمە. سوندىقتان بەيبىت جيىنعا قاتىسقانداردى جاۋاپقا تارتۋ قاۋپى — ءوز الدىنا قىسىم قۇرالى. سول سەبەپتى بۇل ماسەلەدە سۇراقتى «جەڭىس قاسىمبەكتە جاۋاپكەرشىلىك بار ما ءوزى?» دەپ قويعانىمىز ءجون-اق.
ال «استانا-كوگالداندىرۋ قۇرىلىسى» جشس باسشىلىق قۇرىلىمىندا مىنا ادامدار وتىر:
«استانا-كوگالداندىرۋ قۇرىلىسى» جشس باس ديرەكتورى
ميحايل ۆالەريانوۆيچ كوشكين
باس ديرەكتوردىڭ تەحنيكالىق قامتاماسىز ەتۋ جونىندەگى ورىنباسارى
اسلان اسكاروۆيچ ساتين
باس ديرەكتوردىڭ ەكونوميكا جانە قارجى جونىندەگى ورىنباسارى
گۋلناز ەمبەرگەنوۆنا رامازانوۆا
باس ديرەكتوردىڭ كوگالداندىرۋ جونىندەگى ورىنباسارى
گۋلنارا نيازبەكوۆنا سىزدىكوۆا
قورىتا ايتقاندا, استانانىڭ اباتتانۋ جوبالارى تسيفرمەن ساندەلگەن ءاربىر كوشەت پەن «QRكودتالعان تالداردى» العا تارتادى, الايدا سول اعاشتاردى وتىرعىزاتىن, سۋاراتىن, قىستا قاردان قورعايتىن ادامدار ەڭبەگى ءالى ءادىل باعالانباي وتىر. ەگەر اكىمدىك كوزبوياۋشىلىق پەن شىنايى الەۋمەتتىك جاۋاپكەرشىلىك اراسىندا دۇرىس تاڭداۋ جاساي المايتىن بولسا, «ميلليون ءتۇپ اعاش» ۇرانى جاسىل ساۋلەت ەمەس, جاسىرىن الەۋمەتتىك داعدارىستىڭ سيمۆولىنا اينالۋى مۇمكىن. مۇنى استانا اكىمى جەڭىس قاسىمبەك «قۇلاعىنا» دۇرىستاپ قۇيىپ السا ەكەن…
