Astana ákimi eńbek daýyn sheshpeı turyp, 1 mln túp aǵashty qalaı otyrǵyzbaq?

Kúni keshe tańda «Astana-Kógaldandyrý qurylysy» JShS júrgizýshileri men mehanızatorlary kásiporyn aýlasynda jınalyp, eńbekaqyny dereý kóterý máselesin talap etti, dep jazdy qandastar.kz

Olardyń aıtýynsha, kompanııadaǵy jalaqy úsh jyl boıy ósip kórmegen, al tólem kúni kelgende «jabylyp qalǵan tehnıkany syltaý etip» keshiktire beretin kórinedi.

Bul týraly Ulysmedia portaly jazǵan. Derekkózge sensek:

«Bizge, negizgi jumys kúshi biz bolsaq ta, alynǵan tehnıkanyń baǵasy men otyrǵyzylǵan kóshetter sany jaıly jıi esep beredi, biraq óz qaltamyzǵa túser naqty teńgeni kóterýge kelgende bári únsiz. Al dırektor dóreki», – deıdi jumysshylardyń biri.

Ákimdik ne deıdi?

Ákimdik bul jınalysty «sankııalanbaǵan» dep atap, resmı túsinikteme taratty: 2024 jyly júrgizýshiler men mehanızatorlardyń ortasha aılyǵy 690 746 teńge bolǵan, al syıaqy bir jarym jylda 15 ret berilipti.

«Qysqy maýsymdaǵy toqyraýdy boldyrmas úshin qarashadan naýryzǵa deıin jalaqy ýaqytyly tólendi, bir jyldan artyq eńbek etkenderge bir aılyq kóleminde saýyqtyrý járdemaqysy qarastyrylǵan», — delingen jaýapta. Alaıda jumysshylar «ortasha» degen kórsetkish naqty qolǵa tıetin somany búrkemeleıdi dep sanaıtyn sııaqty. Sebebi maýsymdyq toqyraýda tabys kúrt tússe, «ortasha» degen statýsty eńseretinder – kásiporyn basshylyǵyndaǵy aılyǵy joǵary qyzmetkerler ekeni anyq. Shyn máninde, jumystyń aýyrlyǵy men zııanyn bilmeı, óz oıyn aıtqan jumysshylardy «jalaqysy joǵary eken» dep aıyptaı sóıleý jalpy ákimdikterdiń úırenshikti tásiline aınalyp barady. Sebebi olarda halyqpen tyǵyz ári shynaıy baılanys joq. Sonda Astana ákimdigi osy jerde birazdan beri jumys isteıtin qyzmetkerler «ishi pysqannan» ereýilge shyqty dep oılaı ma?.. Qyzyq… Jaraıdy, ákimdik kóp jalaqyny kórsetkendeı bolyp, júrgizýshiler men mehanızatorlardyń eńbekaqysyn jazypty. Al basqa qyzmetkerlerdiń jalaqysy qandaı? Bul jóninde ákimdik nege «qýana» aıtpaıdy? Sebebi sol jumysshylardyń jalaqysy tómen ekeni ras bolyp tur…

Buryn isti bolǵan kompanııa

Ákim Jeńis Qasymbek dál osy kúni Memleket basshysyna bıyl Astanada 1 mıllıonnan astam kóshet otyrǵyzý, 180nen kóp qoǵamdyq keńistikti abattandyrý josparyn tanystyryp, «jasyl revolıýııa» týraly jarysa qýana-qýana sóılep júrgen edi. Joba bıýdjetten kóp mıllıard teńge talap etedi, al sol jasyl jelekti otyrǵyzyp, kútip-baptaıtyn jumysshylar ózderin «arzan qol kúshi» sezinip otyr. Muny Jeńis Qasymbek qalanyń basshysy retinde jaqsy bile me eken? Jalpy bul ákim qarapaıym qyzmetkerlermen kezdesýge bara qoımaıdy. Tek elıtalyq Turǵyn úı órtense ǵana shaýyp baratyn ákimniń jataqhana qrtengen kezde turǵyndarmen kezdespegenin buǵan deıin de jazǵan edik.

Kommýnaldyq kásiporyndaǵy áleýmettik ádiletsizdikke jemqorlyq daǵy da qosylyp otyr. 2024 jyldyń maýsymynda «Astana-Kógaldandyrý qurylysy» JShS burynǵy bas dırektory 15 mln teńge para surady degen kúdikpen qamaýǵa alyndy. Tergeý málimetine qaraǵanda, ol quqyq qorǵaý organdaryna qylmystyq isti toqtatý úshin aqsha usynbaq bolǵan ári ótken jyldary kóshet otyrǵyzý jumystarynyń baǵasyn qoldan qymbattatty dep aıyptaldy. Bul oqıǵa kásiporyn qarjysyn baqylaý qalaı álsiregenin kórsetti. Al sol kezde de kompanııa basshylyǵynyń ústinen basqarǵan adam Astana qalasynyń ákimi osy Jeńis Qasymbek emes pe?..

Jeńis Qasymbekte jaýapkershilik bar ma ózi?

Iá, «Astana-Kógaldandyrý qurylysy» JShS 100 % kommýnaldyq menshikke tıesili. Demek akıonerlik jaýapkershilik – tikeleı qala ákimi Jeńis Qasymbektiń moınynda. Eńbekaqy haqynda týyndaǵan shıelenis te, korrýpııalyq janjal da basqarýshy qurylymnyń taza emes ekenin aıǵaqtaıdy. «Balyq basynan shirıdi» degen mátel osyndaıda durys qoldanylsa kerek. Qazaqstanda oı erkindigi qandaı qıyn másele bolsa, jumysshynyń ózi ereýilge shyǵý úshin kúrdeli «rásimderden» ótýi kerek ekeni óz aldyna bólek áńgime. Sondyqtan beıbit jıynǵa qatysqandardy jaýapqa tartý qaýpi — óz aldyna qysym quraly. Sol sebepti bul máselede suraqty «Jeńis Qasymbekte jaýapkershilik bar ma ózi?» dep qoıǵanymyz jón-aq.

Al «Astana-Kógaldandyrý qurylysy» JShS basshylyq qurylymynda myna adamdar otyr:

«Astana-Kógaldandyrý qurylysy» JShS bas dırektory

Mıhaıl Valerıanovıch Koshkın

Bas dırektordyń tehnıkalyq qamtamasyz etý jónindegi orynbasary

Aslan Askarovıch Satın

Bas dırektordyń ekonomıka jáne qarjy jónindegi orynbasary

Gýlnaz Embergenovna Ramazanova

Bas dırektordyń kógaldandyrý jónindegi orynbasary

Gýlnara Nııazbekovna Syzdykova

Qoryta aıtqanda, Astananyń abattaný jobalary ıfrmen sándelgen árbir kóshet pen «QRkodtalǵan taldardy» alǵa tartady, alaıda sol aǵashtardy otyrǵyzatyn, sýaratyn, qysta qardan qorǵaıtyn adamdar eńbegi áli ádil baǵalanbaı otyr. Eger ákimdik kózboıaýshylyq pen shynaıy áleýmettik jaýapkershilik arasynda durys tańdaý jasaı almaıtyn bolsa, «mıllıon túp aǵash» urany jasyl sáýlet emes, jasyryn áleýmettik daǵdarystyń sımvolyna aınalýy múmkin. Muny Astana ákimi Jeńis Qasymbek «qulaǵyna» durystap quıyp alsa eken…