Astana áýejaıynda jolaýshydan maımyl sheshegi anyqtalǵany ras pa: mınıstrlik málimdeme jasady

foto: NUR.KZ/Vladımır Tretıakov

Densaýlyq saqtaý mınıstrligi Astana áýejaıynda jolaýshydan maımyl sheshegi anyqtalǵany týraly aqparatty joqqa shyǵardy. Bul týraly KAZ.NUR.KZ tilshisi mınıstrliktiń baspasóz qyzmetine silteme jasap habarlaıdy.

Mınıstrlik málimetine súıensek, jelidegi materıaldarda maımyl shesheginiń elge enýine qarsy daıyndyq boıynsha ótkizilgen vedomstvoaralyq oqý-jattyǵý barysynda túsirilgen beınematerıal qoldanylǵan. Osy tusta DSM Sanıtarııalyq-epıdemıologııalyq baqylaý komıteti Qazaqstanda maımyl sheshegi aýrýynyń birde-bir jaǵdaıy tirkelmegenin, sondaı-aq syrttan ákelingen juqpaly jaǵdaılardyń tirkelmegenin habarlady. Sondaı-aq, maımyl shesheginiń elimizge enýiniń aldyn alý maqsatynda ótkizý pýnktterinde sanıtarııalyq-karantındik baqylaý kúsheıtildi. DSM habarlaýynsha, jalǵan aqparat taratqan adamdardyń áreketterine quqyqtyq baǵa berý úshin materıaldar quqyq qorǵaý organdaryna joldandy. Vedomstvo áleýmettik jeli qoldanýshylaryn jáne barlyq azamattardy tek resmı derekkózderden alynǵan senimdi aqparatqa ǵana senýge shaqyrdy.