استانا – بۋراباي باعىتىندا جاڭا ەلەكتر پويىزى ىسكە قوسىلدى

«جولاۋشىلار تاسىمالى» اق استانا – بۋراباي كۋرورتى باعىتى بويىنشا قاتىنايتىن جاڭا بۋىنداعى Burabay Express №888/887 ەلەكتر پويىزىن تانىستىردى, دەپ حابارلايدى Qandastar.kz.

زاماناۋي قۇرام پەتروپاۆل قالاسىنداعى وتاندىق «زيكستو» جشس زاۋىتىندا وندىرىلگەن جانە حالىقارالىق ستاندارتتارعا تولىق ساي كەلەدى.

«جولاۋشىلار تاسىمالى» اق ءباسپاسوز قىزمەتىنىڭ حابارلاۋىنشا, جاقىن ارادا Burabay Express جولاۋشىلارىنا جوعارى جىلدامدىقتى ينتەرنەت پەن بورتتاعى تاعامدار ۇسىنىلاتىن بولادى. جاڭا قىزمەت كورسەتۋ فورماتى جولاقى مەن تاماق ءۇشىن قولما-قول اقشاسىز تولەم جاساۋ مۇمكىندىگىن قاراستىرادى – ونلاين جانە جولدا بانك كارتاسى ارقىلى تولەۋگە بولادى.

«بۇل جولاۋشىلارعا جول بويىندا بايلانىستا بولۋعا, فيلم كورۋگە, جۇمىس ىستەۋگە, جاقىندارىمەن سويلەسۋگە مۇمكىندىك بەرەدى», – دەپ اتاپ ءوتتى كومپانيا وكىلدەرى.

ەلوردادان قازاقستانداعى ەڭ تانىمال تۋريستىك باعىتتاردىڭ ءبىرى – بۋرابايعا دەيىنگى ساپار نەبارى 2,5 ساعاتتى الادى. ۇلتتىق تاسىمالداۋشى جولاۋشىلارعا استانانىڭ ەكى تەمىرجول ۆوكزالىنان وتىرۋ مۇمكىندىگىن جانە كۋرورت ايماعىنداعى قوناقۇيلەردىڭ كەلۋ-كەتۋ ۋاقىتىنا ىڭعايلى كەستە ۇسىنادى.

Burabay Express اپتاسىنا بەس رەت قاتىنايدى. بۇل باعىتقا بيلەتتەردى جولاۋشىلار العاش رەت پويىز جونەلتىلەتىن كۇننەن 45 كۇن بۇرىن ساتىپ الا الادى. جولاۋشى تاسىمالىنىڭ قۇنى: ءبىرىنشى كلاستا – 5 805 تەڭگە, ەكىنشى كلاستا – 3 586 تەڭگە, ءۇشىنشى كلاستا – 2 962 تەڭگە.

ەلەكتر پويىزى استانادان تاڭعى ساعات 11:00-دە شىعىپ, بۋرابايعا ساعات 13:35-تە جەتەدى, ال كەرى باعىتتا بۋراباي كۋرورتىنان ساعات 14:15-تە شىعىپ, ەلورداعا ساعات 17:00-دە كەلەدى.

ەلەكتر پويىزدىڭ قالا ماڭىنا قاتىنايتىن قۇرامى التى ۆاگوننان تۇرادى. وندا اۋا باپتاۋ جۇيەسى ورناتىلعان, ءۇش ءتۇرلى جايلى قىزمەت كورسەتۋ كلاسى قاراستىرىلعان جانە بارلىعى 374 ورىن بار.

«جولاۋشىلار تاسىمالى» اق وكىلدەرى جاڭا قۇرامدى ىسكە قوسۋ – قالا ماڭىنداعى تاسىمالدى دامىتۋدىڭ, قىزمەت ساپاسىن ارتتىرۋدىڭ, يننوۆاتسيالاردى ەنگىزۋدىڭ جانە كولىك قىزمەتتەرىنىڭ حالىق ءۇشىن قولجەتىمدىلىگىن قامتاماسىز ەتۋدىڭ كەزەكتى قادامى ەكەنىن اتاپ ءوتتى.

«ۆاگون پاركىن جاڭارتۋ – ۇلتتىق تاسىمالداۋشىنىڭ باستى ستراتەگيالىق مىندەتى», – دەپ تۇيىندەدى ءباسپاسوز قىزمەتى.