Jańalyqtar
Astana – Býrabaı baǵytynda jańa elektr poıyzy iske qosyldy
«Jolaýshylar tasymaly» AQ Astana – Býrabaı kýrorty baǵyty boıynsha qatynaıtyn jańa býyndaǵy Burabay Express №888/887 elektr poıyzyn tanystyrdy, dep habarlaıdy Qandastar.kz.
Zamanaýı quram Petropavl qalasyndaǵy otandyq «ZIKSTO» JShS zaýytynda óndirilgen jáne halyqaralyq standarttarǵa tolyq saı keledi.
«Jolaýshylar tasymaly» AQ baspasóz qyzmetiniń habarlaýynsha, jaqyn arada Burabay Express jolaýshylaryna joǵary jyldamdyqty ınternet pen borttaǵy taǵamdar usynylatyn bolady. Jańa qyzmet kórsetý formaty jolaqy men tamaq úshin qolma-qol aqshasyz tólem jasaý múmkindigin qarastyrady – onlaın jáne jolda bank kartasy arqyly tóleýge bolady.
«Bul jolaýshylarǵa jol boıynda baılanysta bolýǵa, fılm kórýge, jumys isteýge, jaqyndarymen sóılesýge múmkindik beredi», – dep atap ótti kompanııa ókilderi.
Elordadan Qazaqstandaǵy eń tanymal týrıstik baǵyttardyń biri – Býrabaıǵa deıingi sapar nebári 2,5 saǵatty alady. Ulttyq tasymaldaýshy jolaýshylarǵa Astananyń eki temirjol vokzalynan otyrý múmkindigin jáne kýrort aımaǵyndaǵy qonaqúılerdiń kelý-ketý ýaqytyna yńǵaıly keste usynady.
Burabay Express aptasyna bes ret qatynaıdy. Bul baǵytqa bıletterdi jolaýshylar alǵash ret poıyz jóneltiletin kúnnen 45 kún buryn satyp ala alady. Jolaýshy tasymalynyń quny: birinshi klasta – 5 805 teńge, ekinshi klasta – 3 586 teńge, úshinshi klasta – 2 962 teńge.
Elektr poıyzy Astanadan tańǵy saǵat 11:00-de shyǵyp, Býrabaıǵa saǵat 13:35-te jetedi, al keri baǵytta Býrabaı kýrortynan saǵat 14:15-te shyǵyp, elordaǵa saǵat 17:00-de keledi.
Elektr poıyzdyń qala mańyna qatynaıtyn quramy alty vagonnan turady. Onda aýa baptaý júıesi ornatylǵan, úsh túrli jaıly qyzmet kórsetý klasy qarastyrylǵan jáne barlyǵy 374 oryn bar.
«Jolaýshylar tasymaly» AQ ókilderi jańa quramdy iske qosý – qala mańyndaǵy tasymaldy damytýdyń, qyzmet sapasyn arttyrýdyń, ınnovaııalardy engizýdiń jáne kólik qyzmetteriniń halyq úshin qoljetimdiligin qamtamasyz etýdiń kezekti qadamy ekenin atap ótti.
«Vagon parkyn jańartý – Ulttyq tasymaldaýshynyń basty strategııalyq mindeti», – dep túıindedi baspasóz qyzmeti.
