Astana halyqaralyq áýejaıyn sý basty

Astana qalasyndaǵy halyqaralyq áýejaıdyń tóbesinen sý ketip jatyr. Bul týraly Stan.kz aqparat agenttigi habarlaıdy.

Oqıǵa kýágerleri áleýmettik jelide vıdeolarmen bólisip jatyr. Baıqaǵanymyzdaı áýejaıdyń sý aǵar júıesiniń jyryǵynan shyqqan sý strategııalyq nysan ishindegi LED ekran men ǵımarattyń basqa shetindegi júk bólmesiniń de tóbesinen quıylyp jatyr. Vıdeoda qorap toly júkter malmandaı sý bolǵany kórinip tur.

Áýejaıdyń baspasóz qyzmeti bul jaǵdaıǵa túsinikteme berdi.

«Jóndeý jumystaryn júrgizý barysynda merdiger qurylys kompanııasy Astana áýejaıynyń halyqaralyq termınalynda sý qubyryna zaqym keltirdi. Qazirgi ýaqytta zaqymdanýdy joıý boıynsha qajetti jumystar júrgizilýde. Qolaısyzdyqtar úshin keshirim suraımyz, zaqymdanýdy joıý úshin qoldan kelgenniń bárin jasaımyz», – dedi áýejaıdyń baspasóz qyzmeti.