استانا قالاسىندا مەملەكەتتىك ايىپتاۋشىلاردىڭ ەكىنشى فورۋمى باستالدى

فوتو: باس پروكۋراتۋرا

باس پروكۋراتۋرادا مەملەكەتتىك ايىپتاۋشىلاردىڭ ەكىنشى رەسپۋبليكالىق فورۋمى ءوتتى, دەپ حابارلايدى qandastar.kz

پرەزيدەنتىڭ كومەكشىسى ە.ن.جيەنباەۆ, كونستيتۋتسيالىق سوتتىڭ توراعاسى ە.ءا. ازيموۆا جانە ادام قۇقىقتارى جونىندەگى ۋاكىل ا.ە.لاستاەۆ قۇتتىقتاۋ ءسوز سويلەدى.

جۇمىسقا جوعارعى جانە كونستيتۋتسيالىق سوتتاردىڭ, رەسپۋبليكالىق ادۆوكاتتار القاسىنىڭ وكىلدەرى, پارلامەنت دەپۋتاتتارى, كورنەكتى زاڭگەر عالىمدار مەن وڭىرلىك پروكۋراتۋرالاردىڭ قىزمەتكەرلەرى دە قاتىستى.

فورۋمدى اشا وتىرىپ, باس پروكۋرور بەرىك اسىلوۆ مەملەكەت باسشىسى 2022 جىلعى ناۋرىزدا قازاقستان حالقىنا جولداۋىندا ادىلەتتى كازاقستاندى قالىپتاستىرۋدا نەگىزگى قادامداردىڭ ءبىرى بولىپ تابىلاتىن سوت تورەلىگىن جۇزەگە اسىرۋعا ازاماتتىق قاتىسۋدى كەڭەيتۋدى تاپسىرعانىن اتاپ ءوتتى.

بۇگىنگى تاڭدا قىلمىستىق كودەكستىڭ 40-تان اسا باپتارى القابيلەر سوتىندا قارالاتىن اۋىر جانە اسا اۋىر قىلمىستار قۇرامدارىن قامتيدى. جالپى, ەلىمىزدە القابيلەر سوتى ينستيتۋتى 2007 جىلدان بەرى جۇمىس ىستەيدى. وعان ازاماتتاردىڭ سەنىمى جىل سايىن ارتىپ كەلەدى, – دەپ اتاپ ءوتتى قاداعالاۋ ۆەدومستۆوسىنىڭ باسشىسى.

وسى ورايدا پروكۋرورلار مەن ادۆوكاتتاردىڭ بىلىكتىلىگىن ارتتىرۋ ماسەلەلەرىنە ەرەكشە نازار اۋدارۋ قاجەت. ولاردىڭ ساۋاتتى جانە بەلسەندى قاتىسۋى تاراپتاردىڭ جارىسپالىلىعىن ارتتىرۋعا جانە زاڭدىلىقتى نىعايتۋعا ىقپال ەتۋى كەرەك.

سونىمەن قاتار باس پروكۋرور پروكۋرورلاردى كاسىبي دايارلاۋدىڭ ەرەكشە ماڭىزدىلىعىن اتاپ ءوتىپ, مەملەكەتتىك ايىپتاۋشىلاردى الدىن الا دايىنداۋ كەرەكتىگىن باسا ايتتى.

سوندىقتان ول سالالىق قىزمەت پەن قۇقىق قورعاۋ ورگاندارى اكادەمياسىنا ءوز جۇمىسىن تىڭداۋشىلارعا شەشەندىك ونەر مەن كوپشىلىك الدىندا سويلەۋ داعدىلارىن ۇيرەتۋگە باعىتتاۋدى تاپسىردى.

فورۋمدا سونداي-اق القابيلەر سوتىن دامىتۋ پەرسپەكتيۆالارى, القابيلەردىڭ جەكە دەرەكتەرىنىڭ قاۋىپسىزدىگى مەن قورعالۋىن قامتاماسىز ەتۋ, ولاردىڭ قىلمىستىق پروتسەستەگى ءرولىن نىعايتۋ جانە تاعى باسقا ماسەلەلەر تالقىلاندى.

سۋديالار, ادۆوكاتتار, پراكتيك-زاڭگەرلەر مەن پروكۋرورلار القابيلەر ينستيتۋتىن دامىتۋ, قىلمىستىق پروتسەستەگى تاراپتاردىڭ جارىسپالىلىعىن ارتتىرۋ ماسەلەلەرى جانە باسقا دا وزەكتى ماسەلەلەر بويىنشا باياندامالار جاسادى.

فورۋمنىڭ ءبىرىنشى كۇنىنىڭ قورىتىندىسى بويىنشا قاتىسۋشىلار القابيلەر سوتىن دامىتۋدىڭ كوتەرىلگەن ماسەلەلەرىن شەشۋ جانە سوتتا مەملەكەتتىك ايىپتاۋ ساپاسىن ارتتىرۋ بويىنشا ۇسىنىمدار ازىرلەدى.