جاڭالىقتار
Astana LRT-نىڭ قاشىپ كەتكەن بۇرىنعى باسشىسى سوتتالدى
فوتو: Astana LRT
استانانىڭ قىلمىستىق ىستەر جونىندەگى اۋدانارالىق سوتى «استانا LRT» جشس-ءنىڭ بۇرىنعى باسقارما توراعاسى تالعات اردانعا قاتىستى ۇكىم شىعاردى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
سوتتىڭ مالىمەتىنشە, وعان قاتىستى حالىقارالىق ىزدەۋ جاريالانعاندىقتان, ءىس سوتتالۋشىنىڭ قاتىسۋىنسىز سىرتتاي قارالعان.
تەرگەۋ بارىسىندا 2016 جىلدىڭ 22 جەلتوقسانىندا تالعات ارداننىڭ قاجەتتىلىكتىڭ جوقتىعىنا قاراماستان, LRT قۇرىلىسى ءۇشىن قىتاي دامۋ بانكىنەن 257,6 ميلليون دوللار سىرتقى نەسيەنىڭ ءبىرىنشى ترانشىن زاڭسىز سۇراعانى انىقتالدى.
سوتتا LRT جوباسى توقتاپ قالىپ, الىنعان قاراجات ءوز ماقساتىنا ساي يگەرىلمەي, ناتيجەسىندە «City Transportation Systems» جشس-نە 85 ميلليارد تەڭگەدەن استام شىعىن كەلتىرىلگەنى ايتىلدى.
سوتتالۋشىنىڭ كىناسى كۋالاردىڭ ايعاقتارىمەن, ساراپشىلار مەن مامانداردىڭ قورىتىندىلارىمەن, قىلمىستىق ءىس ماتەريالدارىمەن دالەلدەنگەن.
2023 جىلى تالعات اردان بيۋدجەت قارجىسىن جىمقىرعانى ءۇشىن 7 جىلعا سوتتالعان ەدى. جاڭا ۇكىم جازانى 9 جىلعا دەيىن ۇلعايتتى, سونىمەن قاتار ول «City Transportation Systems» جشس-نە 85 ميلليارد تەڭگە كولەمىندە شىعىندى وتەۋگە مىندەتتەلدى.
«سوت ۇكىمىمەن ا كىنالى دەپ تانىلىپ, 4 جىل 8 ايعا باس بوستاندىعىنان ايىرىلدى. سوتتىڭ 03.05.2023 جىلعى ۇكىمى بويىنشا تاعايىندالعان جازانى ءىشىنارا قوسۋ ارقىلى جالپى مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ, 9 جىلعا باس بوستاندىعىنان ايىرۋ جازاسى تاعايىندالدى», – دەلىنگەن سوت حابارلاماسىندا.
سوت ۇكىمى زاڭدى كۇشىنە ەنگەن جوق.
ەسكە سالساق, بۇعان دەيىن سىبايلاس جەمقورلىققا قارسى ءىس-قيمىل اگەنتتىگى حالىقارالىق ىزدەۋ جاريالانعان Astana LRT جشس بۇرىنعى باسشىسى تالعات ارداندى تەرگەۋگە شاقىرعان ەدى. الايدا ول تەرگەۋگە كەلمەگەن. سىبايلاس جەمقورلىققا قارسى ءىس-قيمىل اگەنتتىگى تالعات ارداندى ىزدەۋ جانە ەكستراديتسيالاۋ جۇمىستارى تۋرالى ەسەپ بەرىپ, تالعات ارداننىڭ قايدا ەكەنى انىقتالماعانىن مالىمدەگەن ەدى.
