Astana LRT-nyń qashyp ketken burynǵy basshysy sottaldy

Foto: Astana LRT

Astananyń qylmystyq ister jónindegi aýdanaralyq soty «Astana LRT» JShS-niń burynǵy basqarma tóraǵasy Talǵat Ardanǵa qatysty úkim shyǵardy. Bul týraly qandastar.kz Stan.kz aqparat agenttigine silteme jasap habarlaıdy.

Sottyń málimetinshe, oǵan qatysty halyqaralyq izdeý jarııalanǵandyqtan, is sottalýshynyń qatysýynsyz syrttaı qaralǵan.

Tergeý barysynda 2016 jyldyń 22 jeltoqsanynda Talǵat Ardannyń qajettiliktiń joqtyǵyna qaramastan, LRT qurylysy úshin Qytaı damý bankinen 257,6 mıllıon dollar syrtqy nesıeniń birinshi transhyn zańsyz suraǵany anyqtaldy.

Sotta LRT jobasy toqtap qalyp, alynǵan qarajat óz maqsatyna saı ıgerilmeı, nátıjesinde «City Transportation Systems» JShS-ne 85 mıllıard teńgeden astam shyǵyn keltirilgeni aıtyldy.

Sottalýshynyń kinási kýálardyń aıǵaqtarymen, sarapshylar men mamandardyń qorytyndylarymen, qylmystyq is materıaldarymen dáleldengen.

2023 jyly Talǵat Ardan bıýdjet qarjysyn jymqyrǵany úshin 7 jylǵa sottalǵan edi. Jańa úkim jazany 9 jylǵa deıin ulǵaıtty, sonymen qatar ol «City Transportation Systems» JShS-ne 85 mıllıard teńge kóleminde shyǵyndy óteýge mindetteldi.

«Sot úkimimen A kináli dep tanylyp, 4 jyl 8 aıǵa bas bostandyǵynan aıyryldy. Sottyń 03.05.2023 jylǵy úkimi boıynsha taǵaıyndalǵan jazany ishinara qosý arqyly jalpy memlekettik qyzmette laýazymdardy atqarý quqyǵynan ómir boıyna aıyra otyryp, 9 jylǵa bas bostandyǵynan aıyrý jazasy taǵaıyndaldy», – delingen sot habarlamasynda.

Sot úkimi zańdy kúshine engen joq.

Eske salsaq, buǵan deıin sybaılas jemqorlyqqa qarsy is-qımyl agenttigi halyqaralyq izdeý jarııalanǵan Astana LRT JShS burynǵy basshysy Talǵat Ardandy tergeýge shaqyrǵan edi. Alaıda ol tergeýge kelmegen. Sybaılas jemqorlyqqa qarsy is-qımyl agenttigi Talǵat Ardandy izdeý jáne ekstradıııalaý jumystary týraly esep berip, Talǵat Ardannyń qaıda ekeni anyqtalmaǵanyn málimdegen edi.