جاڭالىقتار
«Astana Qazaqstan Team» كومانداسى نۇربەرگەن نۇرلىحاسىممەن كەلىسىمشارتقا وتىردى
قازاقستاننىڭ 23 جاسقا دەيىنگى ۆەلوشاباندوزدار اراسىنداعى توپتىق جارىسىنىڭ قازىرگى چەمپيونى نۇربەرگەن نۇرلىحاسىم 2022 جىلدان باستاپ «Astana Qazaqstan Team» كومانداسىندا ونەر كورسەتەدى, دەپ حابارلايدى «ادىرنا» ۇلتتىق پورتالى.
بۇل نۇربەرگەننىڭ العاشقى كاسىبي كەلىسىمشارتى بولىپ تابىلادى. قوس تاراپ ەكى ماۋسىمعا جارامدى كەلىسىمشارتقا وتىرعان.
«سپورتتىق مانسابىمدا العا ۇلكەن قادام جاساعانىما وتە قۋانىشتىمىن جانە ءبىراز تولقىپ تۇرمىن. الەمدىك تۋرعا «Astana Qazaqstan Team» كومانداسىمەن بارۋ – بۇل ورىندالاتىن ارمان. جاستار اراسىندا ماۋسىمدى جاقسى وتكىزدىم. بىراق الەمدىك تۋردا مۇلدە باسقا دەڭگەي, باسقا دايىندىق, باسقا ماقساتتار ەكەنىن جاقسى تۇسىنەمىن. وسىنداي مۇمكىندىك بەرگەن الەكساندر ۆينوكۋروۆقا العىس بىلدىرەمىن جانە ماعان ارتىلعان سەنىمدى اقتاۋ ءۇشىن بار كۇشىمدى سالۋعا تىرىسامىن. سونىمەن قاتار العاشقى باپكەرىم ۆياچەسلاۆ نەپومنياششيحكە جانە الەكساندر شۋشەموين باسقاراتىن «Vino – Astana Motors» كومانداسىنىڭ باپكەرلەر شتابىنا العىس ايتقىم كەلەدى. ويىمنىڭ ءبارى جاڭا ماۋسىمدا. ماۋسىمدى بالا كەزىمنەن جانكۇيەرلىك ەتەتىن شاباندوزداردىڭ قاسىندا, ەڭ ۇزدىك كوماندادا باستاۋعا دايىندالىپ جاتىرمىن. مانسابىمنىڭ جاڭا تاراۋى باستالادى. ءبىرىنشى وقۋ-جاتتىعۋ جيىنىندا كوماندامەن كەزدەسۋدى اسىعا كۇتەمىن», – دەدى نۇربەرگەن نۇرلىحاسىم.
«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق, قۇرىلتايشىسى – تۋريزم يندۋسترياسى مەن سپورتتى قولداۋ قورى
ورالباي مەرگەنباي ۇلى
