جاڭالىقتار
استانادا 13 جاستاعى قىزدى بەلگىسىز ەركەك اڭدىعان
فوتو: اشىق دەرەككوز
استانادا 22 ماۋسىم كۇنى كامەلەتكە تولماعان قىز بالانى اڭدۋ فاكتىسى تىركەلدى. كەشكى ساعات 17:30 شاماسىندا شامامەن 30 جاستاعى بەلگىسىز ەر ادام №61 باعىتىنداعى اۆتوبۋستا 13 جاستاعى قىزدى اڭدىپ, ودان كەيىن سىعاناق كوشەسىندەگى ايالدامادان بىرگە تۇسكەن, دەپ حابارلايدى qandastar.kz
كۋاگەرلەردىڭ مالىمەتىنشە, ەر ادام جاسوسپىرىمگە جاقىنداپ, ونى سۇلۋ دەپ اتاپ, تانىسۋعا ارەكەت جاساعان. سودان سوڭ ول قىزدىڭ ارتىنان ەرىپ, قۇلتەگىن كوشەسىندەگى ۇيىنە دەيىن بارعان. بۇل ارەكەت شامامەن جارتى ساعاتقا سوزىلعان.
وقيعادان كەيىن بىردەن 102 جەدەل باسقارۋ ورتالىعىنا قوڭىراۋ شالىنعان. قازىرگى ۋاقىتتا پوليتسيا وقيعا ورنىنا جاقىن ماڭدا ورنالاسقان بەينەباقىلاۋ كامەرالارىن زەردەلەپ, كۇدىكتىنىڭ جەكە باسىن انىقتاۋعا كۇش سالىپ جاتىر. الايدا ازىرگە ونىڭ ناقتى كىم ەكەنى بەلگىسىز.
قىزدىڭ ارتىنان ەرگەن ەر ادامنىڭ ارەكەتتەرى بەينەجازباعا ءتۇسىپ قالعان. ۆيدەوماتەريال قۇقىق قورعاۋ ورگاندارىنا تابىستالدى. پوليتسيا بۇل دەرەككە قاتىستى رەسمي تەرگەۋ جۇرگىزىپ جاتىر.
