جاڭالىقتار
استانادا 16-قاباتتان بوتەلكە لاقتىرعان بالالار جۇرتتى شوشىتتى
استانادا تاڭعى ساعات 4:31-دە كوپقاباتتى ءۇيدىڭ جوعارعى قاباتىنان بەلگىسىز بالالاردىڭ ءتۇرلى زاتتار, سونىڭ ىشىندە پلاستيك بوتەلكە لاقتىرعانى جۇرتتىڭ اشۋىن تۋعىزدى. وقيعا سارايشىق كوشەسىنىڭ بويىندا ورنالاسقان تۇرعىن ءۇي كەشەندەرىنىڭ بىرىندە تىركەلگەن. جەرگە تۇسكەن اۋىر زاتتار تۇرعىنداردىڭ ومىرىنە قاۋىپ ءتوندىرىپ, جەلىدە قىزۋ تالقىعا ءتۇستى, دەپ جازدى Qandastar.kz.
ۆيدەودان بايقاۋعا بولاتىنى – بالكوننان تومەن قاراي بوتەلكە لاقتىرىلىپ, ول ادامنىڭ ۇستىنە ءتۇسۋى مۇمكىن بولعان. وقىس وقيعا الەۋمەتتىك جەلىدە كەڭ تاراپ, كوپتەگەن تۇرعىندار پوليتسيانىڭ ارەكەتسىزدىگىن سىناپ, ۋچاسكەلىك ينسپەكتوردى شاقىرتۋدى تالاپ ەتۋدە.
جەلى قولدانۋشىلارىنىڭ ءبىرى:
«بۇل – ويىن ەمەس. ەرتەڭ بىرەۋدىڭ باسىنا ءدال تۇسسە, مۇگەدەك ەتىپ قويۋى مۇمكىن. قوعامدا مۇنداي جاۋاپسىزدىق ءۇشىن اتا-انالار جاۋاپ بەرۋى كەرەك», – دەپ پىكىر ءبىلدىردى.
تاعى ءبىر تۇرعىن:
«بىزدە دە وسىنداي جاعداي بولعان. 15-قاباتتان سۋ تولى بوتەلكە تاستاپ, ءبىر ادامدى جاراقاتتاۋعا شاق قالدى. بالالار دەپ قاراۋعا بولمايدى. بۇل – قىلمىس», – دەپ جازدى.
پىكىر قالدىرۋشىلار اراسىندا ءتىپتى بالالاردىڭ تارتىبىنە بايلانىستى ۇلتتىق رەڭك بەرىپ, كسەنوفوبيالىق سوزدەر جازعاندار دا تابىلدى. بىراق نەگىزگى ماسەلە – قوعامدىق قاۋىپسىزدىك پەن اتا-انانىڭ جاۋاپكەرشىلىگى.
قازىرگى ۋاقىتتا وقيعا بويىنشا رەسمي مالىمدەمە جاسالعان جوق. سارايشىق اۋدانىنىڭ پوليتسياسى بۇل ىسكە بايلانىستى قانداي دا ءبىر ارەكەتكە كوشپەگەنى سىنعا ۇشىراپ وتىر.
