جاڭالىقتار
استانادا ايگىلى Cardiff ۋنيۆەرسيتەتىنىڭ كامپۋسى اشىلادى
استانادا Cardiff University Kazakhstan رەسمي تۇردە اشىلدى, دەپ حابارلايدى Qandastar.kz. بۇل – Cardiff University العاشقى شەتەلدىك كامپۋسى, ءارى ورتالىق ازياداعى Russell Group جالعىز كامپۋسى. ءىس-شارا حالىقارالىق ءبىلىم بەرۋدى دامىتۋداعى جانە قازاقستان مەن ۇلىبريتانيا اراسىنداعى ستراتەگيالىق ارىپتەستىكتى نىعايتۋداعى ماڭىزدى قادامعا اينالدى.
اشىلۋ سالتاناتىنا قازاقستان رەسپۋبليكاسى مەن ۇلىبريتانيا ۇكىمەتىنىڭ وكىلدەرى, سونداي-اق Cardiff University جانە Cardiff University Kazakhstan باسشىلىعى قاتىستى. قوناقتار قاتارىندا قر عىلىم جانە جوعارى ءبىلىم ءمينيسترى ساياسات نۇربەك, ۇلىبريتانيانىڭ قازاقستانداعى توتەنشە جانە وكىلەتتى ەلشىسى ساللي اكسۆورتي, Cardiff University پرەزيدەنتى جانە ۆيتسە-كانتسلەرى پروفەسسور ۆەندي لارنەر, Cardiff University باس وپەراتسيالىق ديرەكتورى جانە حاتشىسى, سونداي-اق Cardiff University Kazakhstan ديرەكتورلار كەڭەسىنىڭ توراعاسى دوكتور پولا ساندەرسون, Cardiff University كەڭەسىنىڭ توراعاسى پاتريك يانگ بولدى.
«قازاقستان وڭىرلىك اكادەميالىق حاب رەتىندە دامىپ كەلەدى. بيىل ەلىمىزگە 31 مىڭنان اسا شەتەلدىك ستۋدەنت كەلدى. مەملەكەت باسشىسىنىڭ باستاماسىمەن جوعارى ءبىلىم مەن عىلىم سالاسىندا اۋقىمدى ستراتەگيا جۇزەگە اسىرىلىپ كەلەدى. سونىڭ ءبىرى – ەلىمىزدە جەتەكشى شەتەلدىك زەرتتەۋ ۋنيۆەرسيتەت فيليالدارىنىڭ اشىلۋى. سوڭعى ءۇش جارىم جىلدىڭ ىشىندە 40-قا جۋىق شەتەلدىك جوعارى وقۋ ورنى قازاقستانعا كەلسە, ونىڭ بەسەۋى ءىرى كامپۋستارىن اشۋعا شەشىم قابىلدادى», – دەدى مينيستر.
ۆەدومستۆو باسشىسىنىڭ ايتۋىنشا, بۇگىندە قازاقستاننىڭ ءار وڭىرىندە جوعارى دەڭگەيلى شەتەلدىك فيليالدار جۇمىس ىستەي باستادى. ءاربىر سەرىكتەسپەن ون جىلدىق كەلىسىمشارت جاسالىپ, جەرگىلىكتى ۋنيۆەرسيتەتتەردى حالىقارالىق ستاندارتتارعا ساي زەرتتەۋ ۋنيۆەرسيتەتىنە اينالدىرۋ مىندەتتەمەسى الىنعانىن اتاپ ءوتتى.
«مەن ءۇشىن قازاقستاندا Cardiff University فيليالىنىڭ اشىلۋى زور قۇرمەت. بۇل – Cardiff University العاشقى حالىقارالىق كامپۋسى. ءبىز اكادەميالىق تۇرعىدان مىقتى ستۋدەنتتەردىڭ العاشقى لەگىن قابىلداۋدى اسىعا كۇتتىك. سونداي-اق ءبىز Russell Group قۇرامىنداعى قازاقستاندا كامپۋس اشقان العاشقى ۋنيۆەرسيتەت اتاندىق. بۇگىنگى كامپۋستىڭ اشىلۋى – ۇلكەن ەڭبەكتىڭ ناتيجەسى. بۇل رەتتە قازاقستان رەسپۋبليكاسىنىڭ ۇكىمەتىنە ءبىزدىڭ ورتاق ماقساتتارىمىزدى جۇزەگە اسىرۋعا كورسەتكەن قولداۋى ءۇشىن ەرەكشە ريزاشىلىعىمدى بىلدىرەمىن», – دەدى پروفەسسور ۆەندي لارنەر, Cardiff University پرەزيدەنتى جانە ۆيتسە-كانتسلەرى.
Cardiff University حالىقارالىق رەيتينگتەردە ءداستۇرلى تۇردە جوعارى ورىن الادى. QS World University Rankings 2026 نۇسقاسى بويىنشا 181-ورىندا, Complete University Guide 2026 نۇسقاسى بويىنشا 22-ورىندا. زەرتتەۋلەردىڭ 91%-ى حالىقارالىق دەڭگەيدە ۇزدىك دەپ تانىلدى (REF 2021). Russell Group مۇشەلىگى Cardiff University-ءدى ۇلىبريتانياداعى جەتەكشى زەرتتەۋ ۋنيۆەرسيتەتتەرىنىڭ ءبىرى رەتىندە بەكىتەدى.
2025 جىلعى قىركۇيەك ايىنان باستاپ Cardiff University Kazakhstan كەلەسىدەي ءتورت جىلدىق باكالاۆريات باعدارلامالارىنا ستۋدەنتتەر قابىلدايدى:
BSc Computer Science (كومپيۋتەرلىك عىلىم);
BSc Business Management (بيزنەس باسقارۋ);
BEng Civil Engineering (ازاماتتىق قۇرىلىس);
BSc Exploration Geology (گەولوگيا جانە كەن ورىندارىن بارلاۋ).
وقىتۋ تولىق اعىلشىن تىلىندە جۇرگىزىلەدى, ساباقتاردى Cardiff University جانە Cardiff University Kazakhstan پروفەسسور-وقىتۋشىلار قۇرامى جۇرگىزەدى. ۋنيۆەرسيتەت ۇلىبريتانياداعى باس ۋنيۆەرسيتەتتىڭ تىكەلەي باسقارۋىمەن جۇمىس ىستەيدى جانە بريتاندىق ساپا ستاندارتتارىن قامتاماسىز ەتەدى. ستۋدەنتتەر كامپۋستار اراسىندا اكادەميالىق موبيلدىلىككە يە بولادى جانە زاماناۋي جاتاقحانالارمەن قامتاماسىز ەتىلەدى.
