استانادا ءانشى سيۆي ءماحمۋديدىڭ بۇرىنعى كۇيەۋىنە قاتىستى سوت وتىرىسى باستالدى

فوتو: اشىق دەرەككوز

استانادا تانىمال ءانشى سيۆي ءماحمۋديدىڭ بۇرىنعى كۇيەۋى انسار قاجىمۇحان ۇلىنا قاتىستى سوت وتىرىسى باستالدى. ول اسا ءىرى كولەمدە الاياقتىق جاسادى دەپ ايىپتالىپ وتىر. ازىرگە ءىستىڭ ەگجەي-تەگجەيى اشىق جاريالانباعانىمەن, ءبىز ونىڭ ەسىمى اتالعان قىلمىستىق ءىستىڭ ءمان-جايىن انىقتاپ كوردىك. اڭگىمە 50 مىڭ دوللار جايىندا, دەپ حابارلايدى  qandastar.kz  Nege.kz-كە سىلتەپ.

ۇلىتاۋ وبلىسىندا بىلتىر وبلىستىق عىلىمي-ادىستەمەلىك ورتالىق قىزمەتكەرلەرىنە قاتىستى سەنىپ تاپسىرىلعان م ۇلىكتى يەمدەنۋ فاكتىسى بويىنشا ءىس قوزعالعان بولاتىن. وسى ءىس اياسىندا جاسىرىن تەرگەۋ امالدارىن جۇرگىزگەندە, اتالعان ورتالىقتىڭ باس بۋحگالتەرىنىڭ ەلوردالىق پوليتسيا قىزمەتكەرلەرىن ساتىپ الماق بولعان ارەكەتى اشكەرە بولدى. ول ەسىرتكى زاتتارىن ساتۋعا تىرىستى دەگەن ايىپپەن ۇستالعان قىزىنىڭ جازاسىن جەڭىلدەتۋ ءۇشىن قۇقىق قورعاۋ ورگاندارىنىڭ قىزمەتكەرلەرىنە پارا ۇسىنعان.

سوتتا باس بۋحگالتەر ايەل كىناسىن تولىق مويىندادى. ونىڭ ايتۋىنشا, 2024 جىلدىڭ 28 ناۋرىزىندا ادۆوكاتتان قىزىنىڭ استانادا ەسىرتكى ساقتادى جانە ساتۋعا ارەكەتتەندى دەگەن باپپەن ۇستالعانىن ەستىگەن. اناسى ۇرەيلەنىپ, تانىس تۋىسى ارقىلى «ماسەلەنى شەشە الاتىن» ادامداردى ىزدەستىرە باستايدى. سول كەزدە ونىڭ تۋىسىنىڭ كۇيەۋ بالاسى 50 مىڭ دوللارعا «ماسەلەنى شەشۋگە» ۋادە بەرگەن. ايەل بۇل سومانى ەكى بولىككە ءبولىپ تولەپ بەرەدى. بىراق, ۋادە ەتىلگەندەي, ءىستىڭ بابىن جەڭىلدەتۋ مۇمكىن بولماعان.

وسى ءىس بويىنشا سوتتا سول ايەلگە ۋادە بەرگەن ازامات انسار قاجىمۇحان ۇلىنىڭ ەسىمىن اتادى. ونىڭ ايتۋىنشا, انسار «مەندە بۇل ماسەلەنى شەشەتىن ادامدار بار» دەپ سەندىرگەن. اقشا بەرىلگەننەن كەيىن, ۋادە ەتىلگەندەي ناتيجە شىقپاعان سوڭ, ايەل تاراپىنان قارجىنى قايتارۋ تالاپ ەتىلەدى. الايدا, تەرگەۋ ماتەريالدارىنا سايكەس, انسار قاجىمۇحان ۇلى ۋادە ەتىلگەن 50 مىڭ دوللاردىڭ تەك 28 مىڭىن عانا قايتارعان.

تەرگەۋ قورىتىندىسى بويىنشا, انسار قاجىمۇحان ۇلىنىڭ استانا قالاسى الماتى اۋدانىنىڭ پوليتسيا بولىمىندە ەشقانداي دا ناقتى بايلانىستارى بولماعان. العان قاراجاتتى ول جەكە باسىنىڭ پايداسىنا جۇمساعانى ايتىلىپ وتىر.

انسار قاجىمۇحان ۇلىنىڭ بۇرىنعى جارى, ءانشى سيۆي ماحمۋدي جۋىردا جۋرناليست اننا دانچەنكوعا بەرگەن سۇحباتىندا بۇرىنعى كۇيەۋىنىڭ تەك بالالارىنا كومەكتەسپەگەنىن عانا ەمەس, ءتىپتى وعان قوقان-لوقى كورسەتىپ, قورقىتقانىن دا ايتىپ بەردى. سيۆي ءوزىنىڭ قاۋىپسىزدىگى ءۇشىن باسقا قالاعا كوشۋگە ءماجبۇر بولعانىن دا مالىمدەدى.