استانادا ارگەنتينالىق ءتۋريستىڭ 2 مىڭ دوللارلىق كوزىلدىرىگىن ۇرلاپ العان

فوتو: tengrinews.kz

استانا پوليتسەيلەرى 77 جاسار ارگەنتينالىق ازاماتقا قۇنى 2 مىڭ دوللار بولاتىن التىن جالاتىلعان برەندتى كوزىلدىرىگىن قايتارىپ بەردى, دەپ حابارلايدى qandastar.kz ەلوردالىق دەپارتامەنتتىڭ ءباسپاسوز قىزمەتىنە سىلتەمە جاساي وتىرىپ.

ەگدە ەرلى-زايىپتىلار ازيا قالالارىن ارالاپ, كەيىن استاناعا كەلدى. قالا بويىنشا سەرۋەندەۋ كەزىندە ولارعا ەر ادامدار كەلىپ, سۋرەتكە ءتۇسۋدى ۇسىندى. ولاردىڭ بىرەۋى باس تارتقان سوڭ, شەتەلدىكتەن كوزىلدىرىگىن سىناپ كورۋىن سۇراپ, شەتەلدىكتەردىڭ دارمەنسىزدىگىن پايدالانىپ, قاشىپ كەتكەن.

استانا قالاسىنىڭ پوليتسەيلەرى جەدەل-ىزدەستىرۋ ءىس-شارالارى بارىسىندا پاۆلودار وبلىسىندا ەكى كۇدىكتىنى تاپتى. بەلگىلى بولعانداي, سول كۇنى ولار ەلوردا تۇرعىندارىنىڭ ءۇش تەلەفونىن ۇرلاپ كەتكەن.

اتالعان فاكتى بويىنشا قىلمىستىق ءىس قوزعالدى. ۇستالعانداردىڭ ەلوردا اۋماعىندا جاسالعان وسىعان ۇقساس قىلمىستارعا قاتىستىلىعى تەكسەرىلۋدە. ولاردىڭ بىرەۋى ۋاقىتشا ۇستاۋ يزولياتورىنا قامالدى.

ەلوردا قوناعى پوليتسەيلەرگە كاسىبي شەبەرلىگى, جەدەلدىگى جانە كورسەتكەن كومەگى ءۇشىن العىسىن ءبىلدىردى.