استانادا بالالارعا تەمەكى ونىمدەرىن ساتۋعا قارسى رەيد ءوتتى

جاستار الەۋمەتتىك رەيدكە شىقتى. «دالا قىراندارى» قوعامدىق بىرلەستىگى وكىلدەرى سالاۋاتتى ءومىر سالتىن ۇستانۋعا شاقىرادى. سپورتشىلار ساۋدا ورىندارى مەن دۇكەندەردى ارالاپ بالالارعا تاباك ونىمدەرىن ساتپاۋدى تالاپ ەتىپ ءجۇر.

زاڭعا باعىنباعان كاسىپكەرلەر جاۋاپقا تارتىلادى. بۇعان دەيىن ءتۇرلى ۇيىمدار مەن قۇزىرلى ورگان وكىلدەرى ەلورداداعى 700-دەن استام ساۋدا ورىندارىن تەكسەرگەن بولاتىن. دۇكەن ارالاپ جۇرگەن جاستاردىڭ بارلىعى ءتۇرلى بايراقتى باسەكەدە توپ جارعاندار. الەم چەمپيوندارى مەن حالىقارالىق دارەجەدەگى سپورت شەبەرلەرى وسكەلەڭ ۇرپاقتى زياندى ادەتتەن اۋلاق بولۋعا شاقىرادى. الايدا سامساپ تۇرعان ساۋدا ورىندارىمەن باسەكەلەسۋ وڭاي ەمەس.

تاباك ونىمدەرىنىڭ كەيبىرىنە زاڭ جۇزىندە توسقاۋىل بولعانىمەن جاسىرىپ ساتاتىندار از ەمەس.   ۆاسيلي تاحتاي, ارالاس جەكپە-جەكتەن الەم چەمپيونى: — ءبىر دۇكەنگە 2-3 رەت كىرىپ ەسكەرتۋ جاساعان كەزدەرىمىز بولدى. كامەلەتكە تولماعان بالاعا ناسىباي, سنيۋس ساتىپ جاتادى.

ۋچاسكەلىك پوليتسيا ينسپەكتورىن شاقىرىپ, ايىپپۇل سالسا دا قايتادان ساتقانداردى كەزدەستىرەمىز. كامەلەت جاسىنا تولماعانداردىڭ ناسىبايعا اۋەستىگىن دۇكەن ساتۋشىلارى دا راستاپ وتىر. كۇنىنە ونداعان جەتكىنشەك تيىم سالىنعان زاتتى سۇراپ كەلەدى ەكەن.  اياگوز حاسينوۆا, ساتۋشى: — 21 جاسقا دەيىنگى اتاتىن بالالار. جىگىتتەر وسوبەننو. سنيۋس, ناسىباي, تەمەكى سۇرايدى. 16 جاسقا دەيىنگى بالالار ەنەرگەتيكتەردى ءجيى سۇرايدى. العىسى كەلەدى. ساتپايمىز.

«دالا قىراندارى» جاستاردىڭ قوعامدىق بىرلەستىگى سوڭعى ون كۇندە ءجۇز ەلۋدەن استام ساۋدا ورنىن ارالدى. رەيد كەزىندە ارنايى جىبەرگەن جەتكىنشەككە 6 دۇكەندە ناسىباي ساتقان. بەكتەمىر جولداسباەۆ, نۇرا اۋداندىق اكىمدىگى كاسىپكەرلىك ءبولىمىنىڭ باس مامانى: — ول كىسىلەر ناسىباي ساتقان, سنيۋس ساتىپ سول 196-بابى بويىنشا 25 مرپ شتراف سالىنىپ جاتىر. 18-ىنەن باستاپ 30-ىنا دەيىن كۇندە ءبىز 3-4 ساعاتتاپ 20 ماگازيننەن ارالاپ شىعىپ جاتىرمىز.  سپورتتى سەرىك ەتىپ, سالاۋاتتى ءومىر سالتىن ۇستانعان جاستاردان قۇرالعان قوعامدىق بىرلەستىكتىڭ 200-گە جۋىق بەلسەندى مۇشەسى بار.  نۇرا اۋدانىن ارالاعان سپورتشىلار الەۋمەتتىك ماڭىزدى رەيد الداعى كۇندەرى جالعاسادى دەيدى. بۇعان دەيىن استانا قالاسىنداعى ساۋدا ورىندارىنان 4 توننادان استام رۇقسات ەتىلمەگان تاباك بۇيىمدارى تاركىلەنىپتى.