جاڭالىقتار
استانادا بالاسىنىڭ ەمىنە قوماقتى اقشا جيناعان ەرلى-زايىپتى: قما الاياقتىق فاكتىسى بويىنشا اقپارات بەردى
تەرگەۋ امالدارىنا ساي, بالانىڭ قاتىسۋىمەن كورسەتىلگەن بەينەروليكتەر, اسەرلى جازبالار Instagram جانە Facebook ارقىلى جۇرگىزىلگەن تارگەتتەلگەن جارناما مىڭداعان قازاقستاندىقتىڭ جۇرەگىنە اسەر ەتكەن.
Zakon.kz جازعانداي, ازاماتتاردىڭ سەنىمى مەن جاناشىرلىعىن پايدالانا وتىرىپ, كۇدىكتىلەر 1,3 ملرد تەڭگەدەن استام كولەمدە قاراجات جيناعان. الايدا, بالانىڭ ەمىنە تەك 6,4 ميلليون تەڭگە جۇمسالعان.
قالعان قاراجات ەرلى-زايىپتى جەكە قاجەتتىلىكتەرىنە پايدالانىلعان.
ناقتى ايتقاندا, ەلوردادا 3 پاتەر, جەر تەلىمى, 5 اۆتوكولىك ساتىپ الىنعان. سونىمەن قاتار, قاراجاتتىڭ ءبىر بولىگى قۇمار ويىندارىنا جۇمسالعان.
قايىرىمدىلىق قارجىسىن تۇراقتى تۇردە الىپ وتىرۋ ءۇشىن ولار كەلىپ تۇسكەن قاراجاتتىڭ ۇشتەن ءبىر بولىگىن (481 ميلليون تەڭگەدەن استام) الەۋمەتتىك جەلىدەگى پاراقشالارىن جارنامالاۋعا باعىتتاعان. Meta Ads ارقىلى جۇرگىزىلگەن جارناما اۋديتوريانى ەداۋىر كەڭەيتىپ, قايىرىمدىلىق كولەمىن ارتتىرۋعا مۇمكىندىك بەرگەن.
كۇدىكتىلەر تۇركياداعى LIV Hospital كلينيكاسىندا 84 ميلليون تەڭگە تۇراتىن وتا جاساتامىز دەگەن جەلەۋدى دە پايدالانعان. قاجەتتى سوما جينالعانىمەن, شەتەلدە وتا جاسالماعان. كەرىسىنشە, ولار Instagram پاراقشاسىندا اۋەجايداعى «ۇشىپ بارا جاتقان» كورىنىستى بەينەلەيتىن روليك جاريالاپ, وپەراتسيا ءساتتى ءوتتى دەگەن جالعان اقپاراتپەن جازبا سالعان.
سوتقا دەيىنگى تەرگەپ-تەكسەرۋ باستالعانىن بىلگەن سوڭ, ولار قىلمىستىق جولمەن الىنعان اكتيۆتەردى تاركىلەۋدەن جاسىرۋ ماقساتىندا جەر تەلىمىن ءۇشىنشى تۇلعانىڭ اتىنا راسىمدەگەن. الايدا تەرگەۋ بۇل مامىلەنىڭ جالعان ەكەنىن دالەلدەدى.
سوت سانكتسياسىمەن قىلمىستىق جولمەن الىنعان م ۇلىكتەردىڭ بارلىعىنا تىيىم سالىندى.
كۇدىكتىلەرگە قاتىستى بۇلتارتپاۋ شاراسى رەتىندە ۇيقاماق ءتۇرى تاڭدالدى.
قازىرگى ۋاقىتتا قىلمىستىق ءىس سوتتا قارالۋدا.
قر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە قر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.
