جاڭالىقتار
استانادا ديرەكتوردىڭ ءۇيىن سالعان ەر ادام ءتورت جىل بويى ۇلتتىق كومپانيادان جالاقى الىپ كەلگەن
فوتو: pixabay.com
استانادا ديرەكتوردىڭ ءۇيىن سالعان ەر ادام ءتورت جىل بويى ۇلتتىق كومپانيادان جالاقى الىپ كەلگەن. بۇل تۋرالى qandastar.kz Stan.kzاقپارات اگەنتتىگى حابارلايدى.
استانادا ۇلتتىق كومپانيا فيليالىنىڭ ديرەكتورىنا قاتىستى ۇكىم شىقتى. ول ۇيىم ءۇشىن اۋىر زارداپتارعا اكەپ سوقتىرعان قىزمەتتىك وكىلەتتىگىن اسىرا پايدالانعانى ءۇشىن كىنالى دەپ تانىلدى.
ۇلتتىق كومپانيا فيليالىنىڭ ديرەكتورى ا ەسىمدى ازامات ءوزىنىڭ دوسىن قاعاز جۇزىندە ينجەنەر رەتىندە تىركەپ قويعان. سايكەسىنشە كومپانياداعى جۇمىستىڭ ورنىنا ول ا-نىڭ نۇسقاۋىمەن 2019 جىلدىڭ قاراشاسىنان 2023 جىلدىڭ شىلدەسىنە دەيىن ءوز ساياجايىنىڭ قۇرىلىسىنا تارتىلعان. بۇل رەتتە ول ۇلتتىق كومپانيادان ءتورت جىل بويى ەڭبەكاقى العان.
«جاۋاپكەردىڭ زاڭسىز ارەكەتتەرىنىڭ سالدارىنان اكتسيونەرلىك قوعامعا ەڭبەكاقى جانە جۇمىسقا بايلانىستى باسقا دا تولەمدەر تۇرىندەگى 21 066 027 تەڭگە كولەمىندە اسا ءىرى كولەمدە زالال كەلتىرىلگەن», – دەلىنگەن سوت حابارلاماسىندا.
سوتتالۋشى ءوز كىناسىن مويىنداماي, قىلمىستىق قۇقىق بۇزۋشىلىق قۇرامىنىڭ جوقتىعىنا بايلانىستى اقتاۋدى سۇرادى. الايدا ونىڭ كىناسى كۋاگەرلەردىڭ كورسەتۋلەرىمەن, بانك اۋدارىمدارى تۋرالى انىقتامالارمەن, ساراپتاما قورىتىندىسىمەن, تەكسەرۋ اكتىسىمەن, سونداي-اق جاسىرىن تەرگەۋ ارەكەتتەرىنىڭ ناتيجەلەرىمەن دالەلدەندى.
سوت جازا تاعايىنداۋ كەزىندە ەكى جاس بالاسىنىڭ بولۋىن جەڭىلدەتەتىن ءمان-جاي رەتىندە ەسكەردى.
ناتيجەسىندە سوت فيليالدىڭ بۇرىنعى ديرەكتورىن مەملەكەتتىك قىزمەتتە جانە كۆازيمەملەكەتتىك سەكتوردا لاۋازىمداردى اتقارۋ قۇقىعىنان ءومىر بويىنا ايىرا وتىرىپ, 4 جىل 8 ايعا باس بوستاندىعىنان ايىردى. ۇكىم زاڭدى كۇشىنە ەنگەن جوق.
ەسكە سالساق, وسىعان دەيىن اقتوبە وبلىسىندا بالاباقشالاردا باسشىلىق بيۋدجەت قاراجاتىنان 240 ميلليون تەڭگەدەن استام اقشا جىمقىرعانىن جازعانبىز.
