جاڭالىقتار
استانادا ەكى ادام جانجالداسىپ, سوڭى اتىسپەن اياقتالدى
فوتو:اشىق دەرەككوز
ەلوردادا ەكى ەر ادامنىڭ اراسىندا تۋىنداعان جانجال قارۋلى قاقتىعىسقا ۇلاستى. وقيعا سالدارىنان 41 جاستاعى قالا تۇرعىنى جەڭىل جاراقات الىپ, دەنەسىندە سىرىلعان ىزدەر قالعان, دەپ جازدى qandastar.kz
پوليتسيا قىزمەتكەرلەرى ءمان-جايدى انىقتاۋ بارىسىندا جانجال كەزىندە ولاردىڭ ءبىرىنىڭ قارسىلاسىنا تراۆماتيكالىق قارۋدان وق اتقانىن جانە كەيىن وقيعا ورنىنان ءىزىن سۋىتقانىن انىقتادى.
جەدەل-ىزدەستىرۋ شارالارى ناتيجەسىندە الماتى اۋدانىنىڭ پوليتسيا قىزمەتكەرلەرى كۇدىكتىنىڭ جەكە باسىن انىقتادى. ول 27 جاستاعى ازامات بولىپ شىقتى.
ۇستالعان ازامات ءوز كىناسىن تولىق مويىندادى. تەرگەۋ بارىسىندا قىلمىسقا ايعاق زات رەتىندە تانىلعان تاپانشا تاركىلەندى.
قازىرگى تاڭدا اتالعان فاكتى بويىنشا قىلمىستىق ءىس قوزعالىپ, كۇدىكتى ۋاقىتشا ۇستاۋ يزولياتورىنا قامالدى.
استانا قالاسىنىڭ پوليتسيا دەپارتامەنتى ازاماتتاردى زاڭسىز ساقتالعان تراۆماتيكالىق قارۋدى ىشكى ىستەر ورگاندارىنا دەرەۋ تاپسىرۋعا شاقىرادى.
