استانادا كەمشىلىكتەر بار: «جاڭا ادامدار» مۇمكىندىگى شەكتەۋلى جانداردىڭ ماسەلەسىن كوتەردى

فوتو: اشىق دەرەككوز

قازاقستاندا قالالار قارقىندى تۇردە دامىپ, كولىكتەر سانى ارتىپ كەلەدى, بىراق قاراپايىم جاياۋ جۇرگىنشىلەر جولىنىڭ جاقساراتىن ءتۇرى جوق. بۇل ماسەلە, مۇمكىندىگى شەكتەۋلى جاندار ءۇشىن قاتتى بايقالادى. اتاپ ايتقاندا, اربامەن جۇرەتىن مۇمكىندىگى شەكتەۋلى جاندار ءۇشىن, – دەپ جازادى qandastar.kz

استانادا «جاڭا ادامداردىڭ» «گورود» جوباسى بەلسەندىلەرى الەۋمەتتىك ەكسپەريمەنت جۇرگىزدى. استانادا اربامەن قوزعالۋ قالاي سەزىلەدى? بەلسەندىلەرگە ەكسپەريمەنتتە بلوگەر ەركەبۇلان رۇستەموۆ كومەكتەستى. ول ءوز بلوگىندا مۇمكىندىگى شەكتەۋلى جانداردىڭ ءومىرىنىڭ ەرەكشەلىكتەرى تۋرالى ايتىپ, كورەرمەندەرىن ىنتالاندىرادى.

قيمىل-قوزعالىسى شەكتەۋلى استانا قالاسىنىڭ تۇرعىنى ماڭگىلىك ەل داڭعىلىمەن تريۋمف اركاسى اۋماعىنا باعىت الدى. ەكسپەريمەنت بارىسىندا سىناۋشى كوپتەگەن ەڭسەرىلمەيتىن كەدەرگىلەرگە تاپ بولدى. ەركەبۇلان جاياۋ جۇرگىنشىلەر جولىندا پاندۋستار بار بولسا دا, ولاردىڭ ساپاسى ناشار ەكەنىن اتاپ ءوتتى. ولار تىم قۇلاما, تايعاق نەمەسە تار بولۋى مۇمكىن, بۇل ولاردى پايدالانۋدى قيىنداتادى جانە قاۋىپتى ەتەدى.

تەكسەرىس اۋماعىنداعى كوپتەگەن جاياۋ جۇرگىنشىلەر جولى قاجەتتى پاندۋستارمەن جانە باسقا دا قولجەتىمدىلىك مۇمكىندىكتەرىمەن جابدىقتالماعان. بۇل ءجۇرىپ-تۇرۋى شەكتەۋلى ازاماتتارعا ۇلكەن قيىندىقتار تۋعىزادى. ناتيجەسىندە مۇگەدەكتەر بالاما باعدار ىزدەۋگە ءماجبۇر, بۇل جول ءجۇرۋ ۋاقىتىن ۇزارتىپ قانا قويماي, ولاردىڭ قاۋىپسىزدىگىنە قوسىمشا قاتەر توندىرەدى.

«گورود» ازاماتتىق ناۋقانىنىڭ بەلسەندىلەرى قالالىق ورتانىڭ قولجەتىمدىلىگى – جاي عانا ىڭعايلىلىق ەمەس, الەۋمەتتىك ادىلەتتىلىك ماسەلەسى ەكەنىن اتاپ وتەدى. قولايلى قالالىق ينفراقۇرىلىمدى قۇرۋ – ازاماتتاردىڭ قاۋىپسىزدىگىنە جاسالعان قادام, مۇندا ءاربىر ادام ءوزىنىڭ فيزيكالىق مۇمكىندىكتەرىنە قاراماستان قالادا ەركىن قوزعالا الادى. «جاڭا ادامدار» وكىلدەرى وسى ماسەلەنى تالقىلاۋ ءۇشىن استانا قالاسى ەسىل اۋدانىنىڭ اكىمىمەن كەزدەسۋدى جوسپارلاپ وتىر. جاۋاپتى تۇلعالاردىڭ جىلدام جاۋابىن جانە ءوز جۇمىستارىن دۇرىس ورىنداۋىن كۇتەمىز.