Astanada kemshilikter bar: «Jańa adamdar» múmkindigi shekteýli jandardyń máselesin kóterdi

Foto: ashyq derekkóz

Qazaqstanda qalalar qarqyndy túrde damyp, kólikter sany artyp keledi, biraq qarapaıym jaıaý júrginshiler jolynyń jaqsaratyn túri joq. Bul másele, múmkindigi shekteýli jandar úshin qatty baıqalady. Atap aıtqanda, arbamen júretin múmkindigi shekteýli jandar úshin, – dep jazady qandastar.kz

Astanada «Jańa adamdardyń» «Gorod» jobasy belsendileri áleýmettik eksperıment júrgizdi. Astanada arbamen qozǵalý qalaı seziledi? Belsendilerge eksperımentte bloger Erkebulan Rústemov kómektesti. Ol óz blogynda múmkindigi shekteýli jandardyń ómiriniń erekshelikteri týraly aıtyp, kórermenderin yntalandyrady.

Qımyl-qozǵalysy shekteýli Astana qalasynyń turǵyny Máńgilik El dańǵylymen Trıýmf arkasy aýmaǵyna baǵyt aldy. Eksperıment barysynda synaýshy kóptegen eńserilmeıtin kedergilerge tap boldy. Erkebulan jaıaý júrginshiler jolynda pandýstar bar bolsa da, olardyń sapasy nashar ekenin atap ótti. Olar tym qulama, taıǵaq nemese tar bolýy múmkin, bul olardy paıdalanýdy qıyndatady jáne qaýipti etedi.

Tekseris aýmaǵyndaǵy kóptegen jaıaý júrginshiler joly qajetti pandýstarmen jáne basqa da qoljetimdilik múmkindikterimen jabdyqtalmaǵan. Bul júrip-turýy shekteýli azamattarǵa úlken qıyndyqtar týǵyzady. Nátıjesinde múgedekter balama baǵdar izdeýge májbúr, bul jol júrý ýaqytyn uzartyp qana qoımaı, olardyń qaýipsizdigine qosymsha qater tóndiredi.

«Gorod» azamattyq naýqanynyń belsendileri qalalyq ortanyń qoljetimdiligi – jaı ǵana yńǵaılylyq emes, áleýmettik ádilettilik máselesi ekenin atap ótedi. Qolaıly qalalyq ınfraqurylymdy qurý – azamattardyń qaýipsizdigine jasalǵan qadam, munda árbir adam óziniń fızıkalyq múmkindikterine qaramastan qalada erkin qozǵala alady. «Jańa adamdar» ókilderi osy máseleni talqylaý úshin Astana qalasy Esil aýdanynyń ákimimen kezdesýdi josparlap otyr. Jaýapty tulǵalardyń jyldam jaýabyn jáne óz jumystaryn durys oryndaýyn kútemiz.