استانادا قۇرىلىس الاڭىندا كران اۋدارىلىپ, جۇمىسشى قازا تاپتى

فوتو: ۆيدەودان سكرينشوت

استانا قالاسى تۇرار رىسقۇلوۆ كوشەسى 18/5 ءۇي مەكەنجايىندا ورنالاسقان «ابىروي» تۇرعىن ءۇي كەشەنى اۋماعىندا قاتتى جەل سالدارىنان كران اۋدارىلىپ قالدى, دەپ حابارلايدى Qandastar.kz  قازاقپاراتقا سىلتەمە جاساپ.

وقىس وقيعانىڭ بەينەجازباسى الەۋمەتتىك جەلىدە تارادى.

جەلىدەگى اقپاراتقا سايكەس 18 شىلدە ساعات 20:07 شاماسىندا جەلدىڭ كەنەتتەن قاتتى سوعۋى سالدارىنان قۇرىلىس الاڭىندا مۇنارالىق كران اۋدارىلىپ, ءبىر جۇمىسشى ءتىل تارتپاي كەتكەن.

وسى وقيعاعا قاتىستى BI Group قۇرىلىس كومپانياسى تۇسىنىكتەمە بەرىپ, كران تەحنيكالىق جاعىنان دۇرىس كۇيدە بولعانىن مالىمدەدى.

— كران تەحنيكالىق جاعىنان دۇرىس كۇيدە بولدى جانە بارلىق تەحنيكا سياقتى جۇمىس باستالعانعا دەيىن مىندەتتى تەكسەرۋدەن ءوتتى. وقيعا بولعان كەزدە كران وپەراتورى جۇمىستى اياقتاپ, جۇمىس كۇنى اياقتالۋعا جاقىن بولدى. وكىنىشكە قاراي, كراننىڭ قۇلاۋى سالدارىنان ءبىر ادام قازا بولدى. توتەنشە جاعداي قىزمەتتەرىنىڭ داۋىل تۋرالى ەسكەرتۋى وقيعا بولعاننان كەيىن عانا كەلدى. بىز قازا بولعان ادامنىڭ تۋىستارى مەن جاقىندارىنا شىن جۇرەكتەن كوڭىل ايتامىز, — دەلىنگەن كومپانيا تاراتقان حابارلامادا.

بۇدان بولەك BI Group قۇرىلىس كومپانياسى قازا بولعان ادامنىڭ وتباسىنا جان-جاقتى كومەك كورسەتىلەتىنىن اتاپ ءوتتى.

— قازىرگى تاڭدا وقيعا ورنىندا توتەنشە جاعداي قىزمەتتەرى مەن ءتيىستى ماماندار جۇمىس ىستەپ جاتىر. ءبىز قازا بولعان ادامنىڭ وتباسىنا جان-جاقتى كومەك كورسەتىپ, تەرگەۋ ناتيجەلەرى بويىنشا بارلىق قاجەتتى شارالاردى قابىلدايمىز. قازا بولعان ادام مەردىگەر ۇيىمنىڭ قىزمەتكەرى بولعان, — دەپ اتاپ ءوتتى قۇرىلىس كومپانياسىنان.