جاڭالىقتار
استانادا ءماسليحات دەپۋتاتتارىنىڭ ءىى رەسپۋبليكالىق فورۋمى باستالدى
فوتو: اقوردا
مەملەكەت باسشىسى قاسىم-جومارت توقاەۆ بارلىق دەڭگەيدەگى ءماسليحاتتار دەپۋتاتتارىنىڭ ءىى رەسپۋبليكالىق فورۋمىندا ءسوز سويلەدى, دەپ حابارلايدى qandastar.kz اقوردا ءباسپاسوز قىزمەتىنە سىلتەمە جاساپ.
«بارشاڭىزدى ءماسليحات دەپۋتاتتارىنىڭ ءىى رەسپۋبليكالىق فورۋمىنىڭ اشىلۋىمەن قۇتتىقتايمىن!
شىن مانىندە, بۇل جيىننىڭ ءمان-ماڭىزى ايرىقشا. دەپۋتاتتار – وزەكتى ماسەلەلەردى اشىق ايتا بىلەتىن, ازاماتتاردىڭ قوعامداعى وي-پىكىرىن اتقارۋشى بيلىككە تىكەلەي جەتكىزەتىن قاۋىم. ءبىر سوزبەن ايتساق, دەپۋتات بولۋ – حالىقتىڭ ءۇنى بولۋ دەگەن ءسوز. مىسالى, جاڭا عانا ءسوز سويلەگەن ازاماتتار وتە ماڭىزدى ماسەلەلەردى كوتەردى. اسەت ماحامبەتوۆتىڭ بىلىكتى مامان رەتىندە اتوم ەنەرگياسى تۋرالى پىكىرى وزەكتى. سىرىمبەك سارسەمباەۆ مونو-قالالاردى دامىتۋ جونىندە جاقسى ۇسىنىستار ايتتى. رينات زايتوۆتىڭ ۇلتتىق ونەردى قولداۋ تۋرالى پايىمدارى دا ورىندى. دەپۋتاتتار يۋليا كۋچينسكايا جانە ەۆگەني بۋسلاەۆ تا وتە وزەكتى پىكىرلەرىن ايتتى», دەپ ءسوزىن باستادى پرەزيدەنت.
مەملەكەت باسشىسى اتاپ وتكەندەي, ءماسليحات – مەملەكەتتىك بيلىكتىڭ ماڭىزدى تارماعى. ايماق جۇرتشىلىعىنىڭ تىنىس-تىرشىلىگى, مۇڭ-مۇقتاجى قاشاندا ءماسليحات دەپۋتاتتارىنىڭ ءجىتى نازارىندا بولۋعا ءتيىس.
«سايلاۋشىلاردىڭ مۇددەسىن قورعاپ, ەل ءۇمىتىن اقتاۋ – باستى پارىز. مەن ءماسليحاتتاردىڭ قىزمەتىنە ەرەكشە ءمان بەرەمىن. جالپى, ەلىمىزدە 3300-دەن استام ءماسليحات دەپۋتاتى بار. سونىڭ 70 پايىزىنا جۋىعى وسى زالدا وتىر», دەدى قاسىم-جومارت توقاەۆ فورۋم بارىسىندا.
